हनुमानध्वाखाया ३८ गू सम्पदा पुनःनिर्माण क्वचाल

येँ(नेपालभाषा टाइम्स)÷ हनुमानध्वाखा लाय्कू लागाया ३८ गू सम्पदा पुनःनिर्माण क्वचाःगु दु । २०७२ बैशाख १२ गतेया गोरखाया बारपाक केन्द्र विन्दु जुयाः ब्वःगु विनाशकारी भुखाचं हनुमानध्वाखा लाय्कू आपालं सम्पदा क्षति याःगु खः ।

हनुमानढोका दरबार हेरचाह अड्डया कथं भुखाचं क्षतिग्रस्त ७५ गू सम्पदामध्ये ३८ गू सम्पदाया पुनःनिर्माण क्वचायेधुंकूगु दुसा झिंप्यंगूया पुनःनिर्माण जुयाच्वंगु दु । हाल पुनःनिर्माण जुयाच्वंगु सम्पदात वइगु दछि, दत्याया दुने पूर्ण रुपं सिधयेकेगु लक्ष्यलिसें ज्या जुयाच्वंगु अड्डाया प्रमुख सन्दीप खनालं जानकारी बियादीगु दु । अथे हे पुनःनिर्माण सम्पन्न जूगु छुं छुं सम्पदात हस्तान्तरण याये ल्यं दुगु नं वय्कलं धयादीगु दु ।

पुनःनिर्माण सम्पन्न जूगु सम्पदामध्ये नौतले दरवार व उगु दरवार लिक्कं च्वंगु वसन्तपुर टावर, ललितपुर टावर, भक्तपुर टावर व कीर्तिपुर टावर पूर्णरुपं पुनःनिर्माण क्वचायेधुंकूगु दु । चीन सरकारं पुनःनिर्माण याःगु थुपिं सम्पदात हस्तान्तरण याये ल्यं दुनि ।

थुकथं हे मरुसतः, नाट्यश्वर, पञ्चमुखी हनुमान, तारिणीदेवी महाद्यःया देगः, लक्ष्मीनारायण, कागेश्वरी, वंशगोपाल, श्वेत भैरव, सिँल्यं सतः, गद्दी बैठक, तलेजु देगः लिक्क च्वंगु चिग्वःगु देगः, धुकू चुक, प्रताप मल्लया झ्वाता, कँडेल चोकलिसें मेमेगु नं सम्पदाया पुनःनिर्माण क्वचायेधुंकूगु दु । थुकीमध्ये अमेरिकी सरकारया ग्वाहालिइ पुनःनिर्माण जूगु गद्दी बैठक सर्वसाधारणया निंतिं खुल्ला यायेधुंकूगु दु ।

पुनःनिर्माणया ज्या शुरु मजूनिगु २३ गू सम्पदाय् मोहन चुक, सुन्दरी चुकलिसें मेमेगु चुकया सम्पदात खः । आः पुनःनिर्माण जुयाच्वंगु सम्पदाया ज्या क्वमचायेकं मेगु सम्पदाया ज्या शुरु याये मिले मजूगु व छुं छुं सम्पदाया पुनःनिर्माण स्थानीयं रोके यानातःगुलिं न्ह्याके मफयाच्वंगु वय्कलं कनादिल । मेखे माजु देगःया पुनःनिर्माण क्वचायेवं उकिया ्रन्ह्यःनेसं च्वंगु कामदेवया देगःया पुनःनिर्माण शुरु यायेगु वय्कलं धयादिल ।

थनया सम्पदात पुरातत्व विभाग, येँ महानगरपालिका, चीन सरकार, जापानी सहयोग नियोग बागमती प्रदेश पूर्वाधार विकास कार्यक्रमलिसें स्थानीय गुथिपाखें पुनःनिर्माण जुयाच्वंगु दु ।