
प्रमया भारत भ्रमणय् पञ्चेश्वर डीपीआर नं मू एजेण्डा
येँ – प्रधान– मन्त्री केपी ओलीं थ्वहे वालय् यानादीगु भारत भ्रमणय् बहुचर्चित पञ्चेश्वर परियोजना बारे विशेष रुपं खँ ल्ह्वनीगु जूगु दु । खास यानाः थ्व परियोजनाया डीपीआर याकनं तयार यायेगु बारे प्रम ओलीं खँ तयादी धाःगु दु । कांग्रेस नेता शेरबहादुर देउवा न्हापांखुसी प्रधानमन्त्री जूगु इलय् सदनं जबर्जस्ती पारित याःगु महाकाली सन्धिइ पञ्चेश्वरय् बाँध दयेकाः ९२५ मेगावाट विद्युत पिकायेगु खँ दुगु खः । अबले नेपाःया संसदं सन्धि अनुमोदन याःगुयां खुलाया दुने हे डीपीआर तयार यायेगु धाःगु खःसां आः तकं तयार मजूनि । भाजु देउवा लिपांगुखुसी प्रमया रुपय् भारत वंबलय् नं आः लछिं थुकिया डीपीआर तयार यायेगु बचं भारतं बिउगु खः । तर व नं पालना मजू ।
सूत्रं धाः कथं थुकिया डीपीआर तयार याये मफुगुया मू कारण महाकाली खुसिया लः गय् यानाः बाँडफाँड यायेगु धइगु खँय् पिहां वःगु विवाद खः । महाकाली खुसिइ न्हापा राणाकालय् हे दयेकातःगु शारदा बाँधपाखें गुलि नं लः यंकातःगु खः उकियात भारतं तल्लो तटीय अग्राधिकार धकाः दावी यानाच्वंगु दुसा नेपालं उकियात अग्राधिकारया रुपय् माने याये फइ मखु धयाच्वंगु दु । थुकिं यानाः डीपीआर तयार यायेगु ज्याय् तकं पंगः वयाच्वंगु दु । न्हापा नेपाःया संसदं महाकाली सन्धि पारित यायेत प्रस्ताव वःगु इलय् केपी ओलीं थ्व सन्धि अनुमोदन जुइवं नेपाःयात दँय् छगू खर्ब दां फाइदा जुइ धकाः तर्क तयादीगु खः । तर सन्धि अनुमोदन जूगु थौं २२ दँ दयेधुंकलं नं थुकिया डीपीआर तकं तयार मजूनि । अथे हे भारतं थःगु लगानी दुगु कम्पनीया विद्युत जक न्यायेगु जुइ धकाः याःगु निर्णययात नं नेपालं अस्वीकार याःगु दु ।
‘१९५० सन्धिया खँ जुइ मखु’
प्रधानमन्त्री केपी ओलीया आः जुइगु भारत भ्रमणय् सन् १९५० या सन्धि बारे छुं हे खँ जुइ मखु धाःगु दु । नेपाः–भारत प्रवुद्ध समूहया संयोजक लिसें भारतया लागिं नेपाःया पुलांम्ह राजदूत डा. भेषबहादुर थापां थ्व खँ धयादीगु खः । नेपाः व भारत दथुइ जुयाच्वंगु फुक्क हे सन्धि सम्झौताया पुनरावलोकन यायेत गठन जूगु प्रवुद्ध समूहं थौंकन्हय् थुकिया बारे सहलह ब्याकाच्वंगु दु । थ्व पुचलं सन् १९५० या सन्धि पुनरावलोकन यायेमाः धकाः सहमति याःसां थ्व सन्धि खारेज यानाः न्हूगु सन्धि यायेगु खः वा उकियात हे संशोधन जक याःसां गाः धइगु बारे धाःसा छुं निर्णय याये मफुनि । प्रम ओलीं नं थःगु भ्रमणय् थ्व सन्धिया बारे गनं छुं उल्लेख मयाइगु खँ वय्कलं कनादीगु दु ।
LEAVE YOUR COMMENTS