पीचया माग यासें बौद्ध बन्द

सतकय् ब्वःगु धू पनेत ८० लाखया लः छ्वाकेधुंकल

येँ – चाबही–जोरपाटी सतक इलय् हे पीच मयाःगु धासें स्थानीय वासिन्दा व व्यवसायीतय्सं म्हिगः उगु लागाया लँ बन्द यानाः विरोध प्वंकूगु दु । विरोध प्रदर्शनया झ्वलय् आन्दोलनकारी व प्रहरी दथुइ ल्वापु नं जूगु दु । प्रहरीं आन्दोलनरत स्थानीय वासिन्दायात टियर ग्याँस कयेकेवं तनाव जूगु खः ।

ल्वापुइ स्थानीय वासिन्दां अप्पां कयेकूगु खःसा प्रहरीं लाठीचार्ज यासें टियर ग्याँस समेत प्रहार याःगु खः । चुच्चेपाटी–सक्व सतक विस्तार शुरु जूसां आः तक नं पीच मयायेवं स्थानीय वासिन्दा विरोधय् कुहां वःगु ख । उमिसं ‘धू ब्वइगु याकनं बन्द या’, ‘सतक याकनं पीच या’ धकाः नारा थ्वयेकूगु खः ।

स्थानीय वासिन्दां स्वदँ न्ह्यवंनिसें आन्दोलन यानाच्वंगु खःसां सरकार व ठेकेदार कम्पनीं वेवास्ता याःगुलिं म्हीगंनिसें सतकय् हे कुहां वःगु खः । म्हीग स्थानीय वासिन्दां घौछि चक्का जाम याःगु खःसा म्हिगः नं सुथय् ८ बजे निसें यातायात ठप्प याःगु खः । प्रहरी व स्थानीय वासिन्दा दथुइ जूगु झडपय् लानाः छुं मनूत घाःपाः जूगु दु ।

प्रहरीं छेँय् छेँय् दुहां वनाः स्थानीय वासिन्दायात दाःगु खँ धाःगु दु । स्थानीय व्यापारीतय्सं ताः ईनिसें धू ब्वयाच्वंगु खःसा थःपिंसं हे न्हिं स्वक्वः तक ट्यांकरं हयाः छ्वाकेगु यानाच्वनागु खँ धाःगु दु । लः छ्वाकेगु निंतिं जक स्वदँया दुने ८० लाख तका स्वयां अप्वः दां खर्च जुइधुंकूगु व अय्नं धू ब्वयेगु धाःसा म्हो मजूगुलिं सरकारया ध्यानाकर्षण यायेत सतकय् हे कुहां वयेमाःगु खँ धाःगु दु ।

प्रदर्शनया झ्वलय् स्थानीय वासिन्दां लँय् विजुलीया थां ग्वारा तुइकेगु लिसें टायर च्याकाः लँ बन्द याःगु खः । अथे हे सरकारया अन्त्येष्टि यायेगु धकाः शंख पुयाः नं विरोध प्वंकूगु खः । चुच्चेपाटी–सक्व सतक विस्तार यायेगु झ्वलय् सर्वोच्च अदालतं अन्तरिम आदेश जारी यासें स्थानीय जनताया छेँ थुनेगु खःसा दकलय् न्हापां उमित उचित मुआब्जा बीमाः धकाः आदेश बीवं सतक विस्तारया ज्या थाति लाःगु खः ।

तर मन्त्रिपरिषदं आः गुलि सतक विस्तार जूगु खः अन पीच याना छ्व धकाः निर्देशन बिउगु खःसां ठेकेदारं धाःसा उकियात नं पालना मयाः ।
थुगु सतक दयेकेगु ठेक्का हिराचन एन्ड कम्पनीं प्यदँ न्ह्यः काःगु खः । सम्झौता कथं वंगु २०७४ माघ महिनाय् ज्या क्वचायेमाःगु खः । तर आः तक नं दयेकेगु ज्या मन्ह्याकुसें अलपत्र त्वःता तःगु दु । मेखे सरकारं धाःसा ठेकेदारया माग कथं ई थप यायेगु ज्या यानाच्वंगु दु ।

 

 

सम्बन्धित बुखँ

LEAVE YOUR COMMENTS