प्रधानमन्त्री स्वरोजगारय् त्वःफिउपिंत आवेदन बीत इनाप
येँ – येँ महानगरपालिकां प्रधानमन्त्री स्वरोजगार ज्याझ्वःया निंतिं आवेदन बी त्वःफिउपिंत तत्काल फाराम जायेकेत इनाप याःगु दु ।
मनपां ग्वसाः ग्वःगु थुगु ज्याझ्वःया निंतिं फाराम जायेकेगु लिपांगु अवधि बैशाख मसान्त तक बियातःगु खः । येँ मनपाया कथं आतकया दुने महानगर दुनेया ३२ गू वडामध्ये २७ गू वडापाखें जक आवेदन दुहां वःगु जानकारी बिउगु खः ।
येँ मनपाया वडा नं. २८, २९, ३०, ३१ व ३२ वडापाखें छगू नं निवेदन दुहां मवःगु मनपां न्ह्यथंगु दु । सरकारं न्हापांखुसी हःगु थुगु ज्याझ्वलय् आपालं त्वःफिउगुलिं अज्याःपिं फाराम जायेकेत येँ मनपां इनाप याःगु खः । येँ महानगर दुनेया ३२ मध्ये २७ वडापाखें २७० गू आवेदन दुहां वःगु व आशा याःगु स्वयां गाक्कं म्हो आवेदन दुहां वःगु येँ मनपा प्रमुख विद्यासुन्दर शाक्यं जानकारी बियादिल ।
येँ मनपां छुं दिं न्ह्यः जक प्रधानमन्त्री स्वरोजगार ज्याझ्वः व येँ मनपाया आर्थिक दँ २०७६÷०७७ या बजेटया सम्बन्धय् जूगु सहलह ज्याझ्वलय् थुकिया जानकारी बिउगु खः ।प्रमुख शाक्यं जानकारी मदयाः हे यक्वसिनं थुगु ज्याझ्वःया निंतिं फाराम मजायेकूगु खः धासें आः छुं दिं जक ल्यं दुगुलिं याकनं फाराम जायेकेत इनाप यानादिल ।
दुहां वःगु आवेदनया लिधंसाय् वइगु आर्थिक दँनिसें लाभग्राही म्हसीका पौ बी । थुगु ज्याझ्वः अन्तर्गत छगू आर्थिक दँय् न्युनतम सछिन्हु रोजगारय् संलग्न मजूगु परिवार, परिवारया सुं सदस्य रोजगारी मदुगु व सुं नं वैदेशिक रोजगारय् मवंपिंत आवेदन बी फइगु कानुनी व्यवस्था यानातःगु दु ।
LEAVE YOUR COMMENTS