चुनावय् सुरक्षाया जिम्मा सेनायात

येँ (नेपालभाषा टाइम्स)÷ आः वइगु मंसिर ४ गते जुइगु प्रतिनिधिसभा व प्रदेशसभा निर्वाचनया इलय् कारागार व विमानस्थलं प्रहरी व सशस्त्र प्रहरी चीकाः सेना परिचालन याइगु जूगु दु । गृह मन्त्रालयं कारागार व विमानस्थलया सुरक्षा जिम्मेवारी सेनायात बीगु निर्णय यासें ‘एकीकृत प्रतिनिधिसभा व प्रदेशसभा दुुजः निर्वाचन विशेष सुरक्षा योजना’ स्वीकृत याःगु खः ।

गृह मन्त्रालयया निर्णय लिपा म्हीग आइतवाः राष्ट्रपति विद्यादेवी भण्डारीं सेना परिचालन यायेत स्वीकृति बीवं निर्वाचन इलय् प्रहरी व सशस्त्र प्रहरीया थासय् आः सेना परिचालन जुइ ।

उकथं हे मतदानस्थल पिने नं सुरक्षा व्यवस्था यायेगु जिम्मा सेनायात बिउगु दु । सुरक्षा योजना कथं चुनावया सुइन्हु न्ह्यवंनिसें सेनां फ्ल्याग मार्च व पेट्रोलिङ शुइ याइ । राष्ट्रिय सुरक्षा परिषदं वगु भदौ १७ गते सेना परिचालन यायेत मन्त्रिपरिषदयात सिफारिस याःगु खःसा मन्त्रिपरिषदं वंगु भदौ २७ गते निर्वाचनय् सुरक्षाया नितिं सेना परिचालन यायेगु निर्णय याःगु खः ।

थ्व स्वयां न्ह्यः मतपत्र छापे यानाच्वंगु थाय् जनक शिक्षा सामग्री केन्द्रय् सेना परिचालन याःगु खः । उकथं हे मतपत्र, मतपेटिका व निर्वाचन सामग्री ढुवानीया जिम्मा नं सेनायात हे बिउगु दु । निर्वाचनया झ्वलय् ७५ द्वः सेना परिचालन जुइगु खँ गृहमन्त्रालयं धाःगु दु ।

एकीकृत सुरक्षा योजना कथं न्हापांगु घेराय् प्रहरी, निगूगु घेराय् सशस्त्र व स्वंगूगु घेराय् सेना तयेगु निर्णय याःगु दु । सुरक्षा संवेदनशीलताया आधारय् मतदान स्थलयात सामान्य, संवेदनशील व अति संवेदनशील यानाः स्वंगू तहलय् वर्गीकृत यानातःगु दु । निर्वाचन आयोगं देय्न्यंकं १०,८०९१ मतदान स्थल व २२,२२६ गू केन्द्र तयेगु निर्णय यायेधुंकूगु दु ।