ओली विरुद्ध निगूगु चरणया आन्दोलन
संसद पुनर्स्थापना मयाःतले आन्दोलन यायेगु ख्याच्वः
येँ (नेपालभाषा टाइम्स) – प्रचण्ड-नेपाल पक्षं प्रधानमन्त्री केपी ओली विरुद्ध निगूगु चरणया आन्दोलनया घोषणा याःगु दु। प्रचण्ड-नेपाल पक्षं शनिवाः येँय् पत्रकार सम्मेलन यासें पुस २० निसें माघ २३ गते तक चरणवद्ध आन्दोलनया घोषणा याःगु खः । आन्दोलनया ज्याझ्वः कथं पुस २० गते तक पालिकास्तरय् व २५ गते तक वडास्तरीय भेला लिसें संघर्ष सम्बन्धी अभिमुखीकरण ज्याझ्वः न्ह्याकीगु जूगु दु। प्रदेश, जिल्ला, पालिका व वडास्तरय् संघर्ष समिति नं स्वनीगु जूगु दु ।
उकथं हे पुस २१ गते संघीय राजधानी नापं थीथी शहरय् प्रधानमन्त्री ओलीया पलाः बारे अन्तक्र्रिया याइगु जूगु दु। उकथं हे २३ गते नागरिक समाजलिसे अन्तक्र्रिया याइगु ज्याझ्वः दुसा २४ गते जिल्ला प्रशासन ज्याकू मार्फत प्रधानमन्त्रीयात विरोध पौ बीगु ज्याझ्वः दु ।
अथे हे पुस २६ गते संविधान वाचन-ब्याख्या ज्याझ्वः यायेगु लिसें पुस २८ गते देय्न्यंकं छेँय् छेँय् पर्चा इनेगु व गांगामय् त्वाःत्वालय् हाकुगु ध्वाँय् ब्वयेकेगु ज्याझ्वः तयातःगु दु। उकथं हे पुस २९ गते निर्वाचनस्तरीय भेला, ३० गते वडाय् विरोध प्रदर्शन, माघ ५ गते पालिकाय् विरोध प्रदर्शन व १० गते स्वनिगः लगायत देय्या शहरी क्षेत्रय् मोटरसाइकल र्याली याइगु जूगु दु ।
अथे हे माघ १६ व १७ गते प्रदेशय् विरोध सभा यायेगु व २२ गते देय्न्यंकं मसाल जुलुस पिकाइगु ज्याझ्वः दुसा २३ गते येँय् प्रदर्शन व सभा यायेगु ज्याझ्वः दु । प्रधानमन्त्री ओलीं ल्ह्वंगु पलाः मभिंकूतले निरन्तर रुपं आन्दोलन यायेगु खँ नं पत्रकार सम्मेलनय् नेतातय्सं धाःगु दु ।
आन्दोलन पदया लागिं खः : प्रम ओली
प्रधानमन्त्री केपी ओलीं प्रचण्ड-नेपाल पुचः पदया निंतिं ब्वाँय् वनाच्वंगु द्वपं बियादीगु दु । म्हिगः थःगु पक्षीय येँय् भेला यासें वय्कलं उगु द्वपं बियादीगु खः । भेलाय् सम्बोधन यायेगु झ्वलय् वय्कलं धयादी प्रचण्ड-नेपालयात पद माःगु खःसा पार्टीया बैठकय् वनेत नं इनाप यानादीगु दु । वय्कलं धयादी, ‘वय्कःपिंत पद माःगु दु, पद माःगु खःसा बैठकय् वयेमाःगु खः, सुन्तला नयेगु खःसा सुन्तलामा दुगु थासय् वनेमाः ।’ वय्कलं प्रचण्ड नेपाल पुचलं आन्दोलनया घोषणा याःगु जानकारी थःगु जानकारीइ वःगु खँ न्ह्यथँसें आन्दोलनया औचित्य मदुगु खँ नं धयादीगु दु ।
LEAVE YOUR COMMENTS