येँ महानगरया अधिवेशन क्वचाल

येँ(नेपालभाषा टाइम्स)÷येँ महानगरपालिकाया नगरसभाया झिंस्वक्वःगु अधिवेशन क्वचाल । वंगु असार ६ गते अधिवेशनया न्हापांगु बैठक च्वंगु खःसा असार २९ गते आर्थिक दँ ०८०÷८१या बजेट, थीथी विधेयक, मापदण्ड व प्रतिवेदन शंसोधनसहित पारित यासें क्वचाःगु खः ।

महानगर प्रमुख बालेन शाहया अध्यक्षताय् च्वंगु बैठकय् वय्कलं न्ह्यबवयादीगु आ.व. ०८०÷८१या वार्षिक नीति तथा कार्यक्रम, उपप्रमुख सुनिता डंगोलं न्ह्यब्वयादीगु बजने व विनियोजन विधेयक, विधायन समितिया संयोजक लिसें २३ वडाअध्यक्ष मचाराजा महर्जनं न्ह्यब्वयादीगु स्वंगू विधेयक, सुशासन समितिया दुजःलिसें १४ वडाअध्यक्ष सुमन श्रेष्ठं न्ह्यब्वयादीगु थीथी प्रस्ताव सहलहलिपा पारित याःगु खः ।

असार ६ गते अधिवेशनया न्हापांगु बैठकय् मेयर शाहं चालु आर्थिक दँया ज्याझ्वःयात ५२ गू बुँदाय् समीक्षा यासे ११ गू बुँदाया नीति व १२५ गू बुँदाया कार्यनीति पेश यानादीगु खःसा उकिया असार ८ गते च्वंगु निगूगु बैठकं सर्वसम्मतं पारित याःगु खः ।

अथे हे असार १० गते च्वंगु स्वंगूगु बैठकय् प्रमुख शाअं आर्थिक विधेयक व उपप्रमुख सुनिता डंगोलं आर्थिक दँ ०८०÷८१या निंतिं २५ गू अर्व ५४ गू करोड ७८ गू लाख नीद्वः तकाया बजेट पेश यानादीगु खःसा असार २६ गते च्वंगु बैठकय् विधायन समितिया संयोजक महर्जनं ‘सञ्चार व सूचना विधेयक–२०८०’, ‘जनस्वास्थ्य सेवा विधेयक–२०८०’ व ‘महानगर प्रहरी विधेयक–२०८०’, ‘शिक्षा ऐन–२०७५’, कर्मचारी सेवा ऐन–२०७७’या संशोधन विधेयक व‘भवन निर्माण मापदण्ड–२०८०’ पेश यानादीगु खः ।

सुशासन समितिया दुजः श्रेष्ठं स्वास्थ्य सेवा, नगर प्रहरी सेवा व प्रशासन सेवा अन्तर्गत थीथी पदय् दरबन्दी सिर्जना प्रस्ताव यानादीगु खः । थुकथं हे अधिवेशनया लिपांगु बैठकय् लेखा समितिया संयोजक गायत्री पुडासैनीं लेखा समितिया प्रतिवेदन व नगरसभालिसें न्यायिक समितिया सदस्य आशा श्रेष्ठ रौनियारं न्यायिक समितिया प्रतिवेदन न्ह्यब्वयादीगु खः ।

अधिवेशनय् पेश जूगु थीथी प्रस्तावय् वडाअध्यक्षपिं ईश्वरमान डंगोल, उदयचुडामणि वज्राचार्य, बालकृष्ण महर्जन, मचाराजा महर्जन, कार्यपालिकाया दुजःपिं सन्तोष ढुङ्गेल, नविन मैनाली, हर्कबहादुर खाती, भगवान बुढाथोकी, सिर्जना भेटवाल, रत्नाकर बज्राचार्य, रामबाबु कोइराला, रुपा थापा क्षेत्री, महेश नेपाली, थःथःगु धारणा तयादीगु खःसा विधेयक तथा संशोधन विधेयकयाविषयय् न्हुच्छेकाजी महर्जन, कविता दास, सुरेश मानन्धर, चन्द्रदेवी मानन्धर, ज्ञानु डंगोल महर्जन, आशा श्रेष्ठ रौनियार, लीला विशुखें धारणा तयादीगु खः ।

सम्बन्धित बुखँ

LEAVE YOUR COMMENTS