प्रदेश २ या नां ‘मिथिला–भोजपुरा’ तयेत प्रस्ताव

येँ – २ नम्बर प्रदेशया राजधानी जनकपुरं मेथाय् यंकेगु उद्देश्यं नेकपाया छुं नेतातय्सं जनकपुर चुरोट कारखाना सञ्चालन यायेगु खँ हःगु द्वपं नेपाली कांग्रेसया उपसभापति लिसें पुलांम्ह गृहमन्त्री विमलेन्द्र निधिं बियादीगु दु । महोत्तरी जिल्लाया सदरमुकाम जलेश्वरय् च्वंगु पार्टी ज्याकुथी पत्रकार सम्मेलन यासें वय्कलं उगु खँ धयादीगु खः । वय्कलं नेकपाया नेतातय्सं जनकपुर चुरोट कारखानाया सम्पत्तिइ भ्रष्टाचार यायेगु लिसें मीगु षडयन्त्र यानाच्वंगु द्वपं नं बियादिल । जनकपुर चुरोट कारखानाया उगु भवन प्रदेश सरकारया निंतिं उपयुक्त जूगु धासें २ नम्बर प्रदेशया राजधानी जनकपुरय् हे च्वनीगु दावी नं वय्कलं यानादिल ।

नेता निधिं प्रदेश प्रमुखया ज्याकू व आवास, मुख्यमन्त्रीया ज्याकू व आवास, थीथी मन्त्रालय व मन्त्रीया आवास, सभा सम्मेलन यायेगु थाय् लगायत पर्याप्त भौतिक पूर्वाधार दुगुलिं जचुकाया भवन प्रदेश सरकारया ज्या यायेगु निंतिं सहज जुइगु खँ नं दावी नं यानादिल । वय्कलं प्रदेशया नां ‘मिथिला–भोजपुरा’ तयेगु व प्रदेशय् छ्यलाबुला जुइगु न्हापांगु भाय् मैथली व निगूगु भाय् भोजपुरी यायेत नं सुझाव बियादिल ।

देशय् संघीयताय् वनेधुंकाः नं थीथी प्रदेशया राजधानी गन तयेगु व उकिया नां छु तयेगु धइगु बारे अझ नं सरकारं क्वःछी फयाच्वंगु मदु । अथेहे प्रदेशया राजधानी व प्रदेशया नां क्वःछीगु अधिकार संविधानं प्रदेश सरकारयात बियातःगु दुसां नं प्रदेशया राजधानी व नां क्वःछीबलय् विवाद वयेफइगु ग्याःचिकुं यानाः प्रदेश सरकारतय्सं प्रदेशया नां घोषणा मयानाच्वंगु खः ।

थीथी प्रदेशया राजधानीया नां तयेबलय् बाहुल्यता दुगु जातिया पहिचानयात कःघायेमाःगु माग जुयाच्वंगु दुसा मेखे संघीय सरकार व तःधंगु दलतय्सं धाःसा जातीय पहिचान दुगु नां फयांफछि मतयेगु ग्वसाः दयेकाच्वंगु दु ।

सम्बन्धित बुखँ

LEAVE YOUR COMMENTS