नारायणी खुसि बांलाकेत गुरुयोजना

येँ – ऐतिहासिक, धार्मिक व पर्यटकीय महत्वं जायाच्वंगु नारायणी खुसियात व्यवस्थित यानाः सुन्दर व रमणीय दयेकीगु जूगु दु । थुकिया निंतिं वृहत् गुरुयोजना दयेकाः राष्ट्रिया गौरवया आयोजना कथं न्ह्यःने यंकेगु खँ धाःगु दु । प्रदेश नं. ३ या सरकारं मदन भण्डारी फाउन्डेशन चितवनया अध्यक्ष डा. तिलचन्द्र भट्टराईया संयोजकत्वय् विज्ञ समिति दयेकाः गुरु योजनाया प्रतिवेदन दयेकेगु ज्या न्ह्याकूगु दु ।

समितियात वैशाख महिना दुने हे प्रतिवेदन लःल्हायेत कार्यादेश बियातःगु दु । समितिया संयोजक भट्टराईं बहुवर्षिय योजना कथं ज्या यायेत विस्तृत अध्ययन प्रतिवेदन तयार यायेत अःपुइ कथं आःयात गुरुयोजनाया प्रारम्भिक प्रतिवेदन तयार जुयाच्वंगु दु । वय्कःया कथं नारायणी खुसिया निखेरं व्यवस्थित तटबन्ध दयेकेगु व प्यंगू लेनया सतक दयेकेगु कथं गुरुयोजना निर्माण जुयाच्वंगु दु ।

अथेहे खुसिया लखय् स्वच्छता हयेत फोहर लः प्रशोधन यायेगु ज्या नं जुइ । कालीगण्डकी व त्रिशुली खुसी ल्वाकज्यानाः नारायणी खुसि जूगु खः । उकिं कालीगण्डकीया उद्गमस्थल मुक्तिनाथ व दामोदर कुण्ड व त्रिशुलीया उद्गमस्थल गोसाँइकुन्डंनिसें हे खुसिइ स्वच्छता हयेगु निंतिं ज्या यायेगु कथं गुरुयोजना दयेकाच्वनागु खँ वय्कलं कनादीगु दु ।

प्रदेश नं. ३ या सरकारया सल्लाहकार जगन्नाथ थपलियां थ्व गुरुयोजना दयेकेवं प्रदेश नं. ३, गण्डकी प्रदेश व स्थानीय सरकारया सहकार्यं नारायणी खुसिइ बहुउद्देश्यीय कार्यक्रमया ज्या न्ह्याःवनीगु खँ कनादिल ।नारायणी खुसि व वया लिक्क लाःगु क्षेत्रयात पर्यटकीय गन्तव्य कथं विकास यायेगु वय्कलं धयादीगु दु । विदेशय् खुसियात संरक्षण यानाः आर्थिक क्रियाकलापय् छ्यलाच्वंगु धासें नारायणी खुसियात नं व हे ढंगं संरक्षण यानाः व्यवस्थित यायेगु खँ कनादिल ।