अमेरिका, बेलायत व अस्ट्रेलियाया दथुइ जूगु सुरक्षा सम्झौताया चीनपाखें निन्दा

एजेन्सी- अमेरिका, बेलायत व अस्ट्रेलिया दथुइ जूगु सुरक्षा सम्झौताया चीनं निन्दा याःगु दु । चीनं अमेरिका, बेलायत व अस्टे्लिया दथुइ जूगु सुरक्षा सम्झौतां शीतयुद्धया मानसिकता क्यंगु धाःगु दु । थ्व स्वंगू देय् दथुइ बुधवाः हिन्द प्रशान्त महासागरय् चीनया प्रभाव व सैन्य उपस्थितियात कयाः सुरक्षा सम्झौता जूगु खः ।

‘ओकस’ नांयागु सम्झौताय् आर्टिफिसियल इन्टेलिजेन्स, साइबर सुरक्षा व क्वान्टम टेक्नोलोजी थेंज्याःगु विषय दुथ्याः । सम्झौताय् अमेरिकां अस्टे«लियायात न्यूक्लियर पनडुब्बी बिइगु नं धयातःगु दु ।
चीनं अमेरिकां अस्टे«लियायात न्यूक्लियर पनडुब्बी बिइगु कारणं हतियारया अन्तर्राष्ट्रिय प्रसार पनेगु कुतलय् धक्का लाःगु धाःगु दु । थ्व गैरजिम्मेदारपूर्ण ज्या जूगु चीनं धाःगु दु । थज्याःगु गठबन्धन दयेकाः मेगु राष्ट्रयात लक्षित यायेमजिउगु खँ नं चीनं धाःगु दु ।