चुनाव खर्च अप्वया वंगु खँय् विज्ञत चिन्तित

येँ -राजनीतिक पार्टीतय्सं चुनावया इलय् याइगु खर्च पारदर्शी यायेगु लागिं उमित छगू मापदण्ड दयेकाः राज्यकोषपाखें हे खर्च उपलब्ध याकेगु व्यवस्था यायेमाःगु बिचाः विज्ञतय्सं तया हःगु दु ।

चुनावय् थुलि तक जक खर्च याये दइ धकाः निर्वाचन आयोगं आचार संहिता जारी याःसां दल व उम्मेदवारतय्सं थ्व स्वयां तसकं यक्व दां खर्च याइगु जुयाः उकियात नियन्त्रण यायेत राज्यकोषं हे खर्चया व्यवस्था याये माःगु खँ धाःगु दु ।

चुनावय् दल व उम्मेदवारं न्यागः ध्यबा हे खर्च याये मदइगु व माःगु खर्च राज्य कोषं हे यायेगु व्यवस्था जुल धाःसा चुनावय् अत्यधिक रुपं याइगु खर्चयात नियन्त्रण याये फइगु बिचाः निर्वाचन आयोगया पुलांम्ह प्रमुख आयुक्त भोजराज पोखरेलं तयादीगु दु ।

निर्वाचन आयोगया सूत्रं धाः कथं न्हापा न्हापाया चुनावय् जुइगु खर्चयात नियन्त्रण यायेगु लागिं राज्यपाखें थज्याःगु व्यवस्था याये माली धइगु प्रस्ताव निर्वाचन आयोगं छक्वः छ्वःगु नं खः । तर राजनीतिक दलतय्सं उकियात अस्वीकार याना बिल ।

थौंकन्हय् प्रतिनिधिसभाया चुनाव जुइबलय् तीव्र प्रतिस्पर्धाय् वनीम्ह छम्ह उम्मेदवारं छगू करोड स्वयां अप्वः खर्च यायेगु यानाच्वंगु दु । निर्वाचन आयोगं धाःसा झिगू लाख स्वयां अप्वः खर्च याये मदु धकाः आचार संहिता दयेका तःगु दु ।

यदि निर्वाचन प्रणाली थथे हे जुयाच्वन धाःसा भविष्यय् वनाः चीधंगु पार्टी जक मखु तःधंगु हे पार्टीयाम्ह खःसां ध्यबा खर्च याये मफुम्ह उम्मेदवार जुल धाःसा सुनां हे चुनाव ल्वाये मफइगु अवस्था वइगु ख्याच्वः नं विज्ञतय्सं बीगु यानाच्वंगु दु ।

सम्बन्धित बुखँ

LEAVE YOUR COMMENTS