७ प्रतिशत जक आर्थिक वृद्धिदर चूलाइगु अनुमान

येँ – आर्थिक दँ २०७५÷७६ य् थ्यंमथ्यं ७ प्रतिशत आर्थिक वृद्ध दर जुइगु अनुमान याःगु दु । सरकारं चालु आर्थिक दँय् ८ प्रतिशत आर्थिक वृद्धि दर चूलाकेगु लक्ष्य तयातःगु खःसां वंगु च्यालाया आर्थिक सर्वेक्षणं मुक्कं ६.८१ प्रतिशत जक आर्थिक वृद्ध दर चूलाइगु तथ्यांक खनेदुगु खः । कृषि क्षेत्रय् वृद्धिदर उत्साहजनक दुसां निर्माण क्षेत्रय् थगुने स्वयां म्हो जक वृद्धिदर खनेदुगुलिं सरकारया लक्ष्य चूमलाइगु खनेदुगु खः ।

अर्थमन्त्री युवराज खतिवडां सोमवाः संसद्य् न्ह्यब्वःगु वंगु च्यालाया आर्थिक सर्वेक्षण कथं थ्व अवधिया औसत मुद्रास्फीत दर ४ दशमलब २ प्रतिशत जुइगु जानकारी नं बियादीगु खः । अथे हे वय्कलं चालु आर्थिक दँय् आर्थिक, सामाजिक व भौतिक पूर्वाधार विकासया परिसूचक धाःसा उत्साहजनक खनेदुगु खँ धयादीगु दु । राजनीतिक स्थायित्व कायम जूगुलिं लगानीया वातावरणय् वःगु सुधार, नियमित रुपं मत वयाच्वंगु व स्थानीय तहपाखें विकासया गतिविधि अप्वःगु कारणं अर्थतन्त्र उच्च आर्थिक वृद्धिया लँपुइ न्ह्यावनाच्वंगु खँ नं वय्कलं धयादीगु खः ।
अथेहे वय्कलं आर्थिक क्रियाकलाप विस्तार जुयावंगुलिं प्रतिव्यक्ति आम्दानी अप्वःगु, कूल गार्हस्थ उत्पादनय् वःगु वृद्धिं यानाः बचत यायेगु क्षमता अप्वःगु व तःदँ लिपा न्हापांखुसी आन्तरिक बचतं कूल गार्हस्थ उत्पादनया २० प्रतिशत फपूगु जानकारी नं बियादीगु खः । थुकिं राष्ट्रिय पुँजी निर्माणय् उल्लेख्य योगदान जुइगु खँ वय्कलं धयादीगु दु ।

व्यापार घाटा ८८८ अर्ब
सर्वेक्षण प्रतिवेदनय् व्यापार घाटा धाःसा अझं उच्च हे दुगु न्ह्यथनातःगु दु । औद्योगिक व पूँजीगत सामानया आयात अप्वःगु व निर्यात म्हो जूगु कारणं व्यापार घाटा अप्वया हे वनाच्वंगु दु । थुकिं यानाः शोधनान्तर स्थिति व विदेशी विनिमय संचिति नं चाप लाःगु सर्वेक्षणय् न्ह्यथनातःगु दु । फागुन तक वस्तु निर्यात १४.६ प्रतिशतं अप्वया ६१ अर्ब थ्यंगु दुसा वस्तु आयात २३.८ प्रतिशतं अप्वया ९ खर्ब ४९ अर्ब थ्यंगु दु । थ्व अवधिइ कुल वस्तु व्यापार घाटा ८ खर्ब ८८ अर्ब थ्यंगु दु । अथेहे फागुन तक शोधनान्तर स्थिति ५९ अर्ब घाटाय् दु । थ्व अवधिइ चालु खाता १ खर्ब ९१ अर्ब घाटाय् दु । रेमिट्यान्स धाःसा २३.४ प्रतिशतं अप्वयाः ५ खर्ब ८२ अर्ब थ्यंगु दु । थ्व अवधि दुने श्रम स्वीकृति कयाः वैदेशिक रोजगारीइ वंपिनि ल्याः ३५.९ प्रतिशत म्हो जूगु दु ।

गरिबया ध्व क्वः १८.७ प्रतिशत जनसंख्या
चालु आर्थिक दँय् प्रतिव्यक्ति आय १ लाख १७ हजार थ्यनीगु अनुमान यानातःगु उगु सर्वेक्षणय् गरिबीया ध्वः क्वय् लानाच्वंपिनि जनसंख्या नं १८.७ प्रतिशत कुहां वइगु अनुमान यानातःगु दु ।

९ खर्ब ७८ अर्ब त्यासा
चालु आर्थिक दँया फागुन तक अनुदान १३ अर्ब व त्यासा ९३ अर्ब यानाः मुक्कं छगू खर्ब न्हय्गू अर्ब वैदेशिक सहयोगया प्रतिवद्धता वःगु दु । अथेहे वंगु फागुन तकया कूल सार्वजनिक त्यासा ९ खर्ब ७८ अर्ब दु, उकी मध्ये ३ खर्ब ८३ लाख ५९ करोड आन्तरिक त्यासा खःसा ५ खर्ब ९५ अर्ब बाह्य त्यासा खः ।

११ अर्ब लगानी प्रतिबद्धता
अथेहे फागुन तक २१८ उद्योय् ११ अर्ब लगानीया प्रतिवद्धता वःगु दु । थुकी थप ७,९५३ गू रोजगारी सिर्जना जुइगु अनुमान यानातःगु दु । कूल जनसंख्याया ७७.८ प्रतिशत जनसंख्याय् मतया सुविधा थ्यंगु दुसा कुल मत उत्पादन ११४२ मेगावाट थ्यंगु दु । अथेहे कुल जनसंख्याया १८ प्रतिशत जनसंख्याय् नवीकरणीय ऊर्जा स्रोतपाखें मत थ्यनाच्वंगु सर्वेक्षणय् न्ह्यथनातःगु दु ।

गौतमबुद्ध अन्तर्राष्ट्रिय विमानस्थल दयेके क्वचाइगु
अर्थमन्त्री खतिवडां चालु आर्थिक दँय दुने राष्ट्रिय गौरवया आयोजना जुयाच्वंगु भैरहवाय् च्वंगु गौतमबुद्ध अन्तर्राष्ट्रिय विमानस्थल दयेके क्वचाइगु खँ धयादीगु दु । अथेहे पोखरा क्षेत्रीय अन्तर्राष्ट्रिय विमानस्थल, मध्यपहाडी लोकमार्ग व उत्तर दक्षिण लोकमार्गया ज्या तीव्र गतिं न्ह्याइगु खँ धयादीगु खः ।

११ लाख ७३ हजार पर्यटक
सन् २०१८ य् स्थलमार्ग जुयाः वःपिं भारतीय पर्यटक बाहेक ११ लाख ७३ हजार पर्यटक नेपाः चाःहिउवःगु दु । थुकी हवाई मार्ग जुयाः वइपिं पर्यटकतय् ल्याः
८२.८ प्रतिशत व स्थलमार्ग जुयाः वःपिनि ल्याः १७.२ प्रतिशत दु ।

पुनःनिर्माण
सर्वेक्षण कथं वंगु फागुन तकया दुने थ्यंमथ्यं खुगू लाख ५ हजार निजी क्षेत्र दयेके ज्या न्ह्याःगु दुसा २६२ खा सरकारी भवन, ४२०१ विद्यालय भवन, ६४३ गू स्वास्थ्य संस्था भवन, २२१ गू पुरातात्विक सम्पदा व १२४ गू सुरक्षा निकायया भवन पुनःनिर्माण पूवंगु दु ।