ने. सं. ११४३ चौलाथ्व तृतीया -

धर्मकीर्ति विहारय् उपकुलपति वज्राचार्य व आचार्य राणायात लसकुस

येँ- थनया सीघलय् च्वंगु धर्मकीर्ति विहारय् लुम्बिनी विश्वविद्यालयया नवनियुक्त उपकुलपति प्रा. डा. हृदयरत्न वज्राचार्य व विद्याधर आचार्य महायोगी श्रीधर राणा रिम्पोछेयात छगू ज्याझ्वःया दथुइ लसकुस यायेगु ज्या जुल ।
धर्मकीर्ति विहार संरक्षण कोषया ग्वसालय् जूगु ज्याझ्वः श्रद्धेय धम्मावति गुरुमांया सभापतित्वय् जूगु खःसा अगम्यरत्न कंसाकारं लसकुस यानादीगु खः । वय्कःपिंत खादा व स्वां देछासे लसकुस याःगु खः ।

ज्याझ्वलय धम्मावति गुरुमानं धर्मोपहार देछाना बिज्यासें ओवाद उपदेश बियाबिज्यायेगु झ्वलय् आः बौद्धमार्गीतय्सं थेरवाद, वज्रयान व महायान मधासे बौद्धयान जक धयाः झी सकलें छगू हे खः धइगु सन्देश ज्वनाः न्ह्याः वनेमाः धयाबिज्यात ।

रिम्पोछे गुरु आचार्य श्रीधर राणां थौंया इलय् बौद्धत सहनशील जक धयाः च्वने मजिउ धासें सहनशीलता नापनापं प्रज्ञा नं दयेकाः बुद्ध शिक्षायात अनुकूल व्यवहारय् लागू यानाः न्ह्याः वने फत धाःसा बौद्ध एकताया सम्भावना दुगु खँ धयादिल ।

अथे हे नवनियुक्त उपकुलपति वज्राचार्यं बुद्ध धर्म व विज्ञान आपालं ज्वः लाःसां विज्ञानं विध्वसं नं हये यः धासें बुद्ध धर्मं समाजय् शान्ति हयेगु ज्या याइ धयादिल । लिसें वय्कलं बुद्ध शिक्षायात समाजय् थ्यंकेगु तातुनाः विश्वविद्यालयं थीथी योजना दयेकाच्वनागु नं जानकारी बियादिल ।