जर्मनीइ नेवाः तजिलजि नखः ज्याझ्वः

येँ(नेपालभाषा टाइम्स)÷युरोपेली देय् जर्मनीइ च्वना वयाच्वंपिं नेवाःतय्सं ‘नेवाः तजिलजि नखः’या नामं छगू ज्याझ्वः याःगु दु । जर्मनीइ च्वनाच्वंपिं नेवाःतय् संस्था पासा पुचः जर्मनीया ग्वसालय् वंगु आइतवाः फ्य्राङ्कफर्टय् उगु ज्याझ्वः जूगु खः ।

मौलिक नेवाः कला, संस्कृति, भाषा, तिसावसः ज्वलंया जानकारी बीगु, उकियात ल्यंका तयेगुनापं भावी पुस्तायात नं सीके सयेके बीगु व हस्तान्तरण याना वनेगु ल्याखं ज्याझ्वः ग्वसाः ग्वयागु ज्याझ्वःया कजि शंकर महर्जनं जानकारी बियादीगु दु । व्यवसायीलिसें समाजसेवी महर्जनं ज्याझ्वःया प्रमुख आकर्षणया रुपय् ख्वपया अतिकं नांजाःगु घिन्तांघिसि प्याखं जूगु नं जानकारी बियादीगु दु । लाखे प्याखंलिसें थीथी नेवाः हुलाप्याखं, लाईभ म्युजिक, म्येँ नं न्ह्यब्वःगु ज्याझ्वलय् समय्बजिलिसें थीथी नेवाः नसा ज्वलं नं तयातःगु खः ।

ज्याझ्वलय् जर्मनीस्थित थीथी नेवाः नेपाली संघसंस्था, व्यवसायी, ब्वँपिलिसें युरोपस्थित गैर नेवाः, युरोपियनत यानाः प्यसः स्वयां अप्वःसिनं ब्वति काःगु वय्कलं जानकारी बियादीगु दु ।

थुकथं ज्याझ्वलय् वल्र्ड नेवाः अर्गनाइजेसन (डब्लुएनओ)या केन्द्रीय न्वकु रजनी प्रधान, सल्लाहकार रवीन्द्रमान श्रेष्ठ, डब्लुएनओ युरोपया संयोजकलिसें नेवाः खलः ह्यामवर्गया संस्थावक कुमार नापित, नेवाः खलः ह्यामबर्गया संस्थापक नायः मानवकुमार श्रेष्ठ, अपांगताया क्षेत्रय् प्यंगू दशकनिसें सेवा यानावयाच्वनादीम्ह रमेश श्रेष्ठ लगायतया सहभागिता दुगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल