तयारी वसःया निर्यात अप्वल
येँ – वंगु छुं दँ तक थ्यंमथ्यं स्थीर थें जुयाच्वंगु तयारी वसःया निर्यात चालू आर्थिक दँया सुरुवात निसें धाःसा अप्वःगु दु । थगुनेया तुलनाय् चालु आर्थिक दँया न्हापांगु चौमासिक तयारी वसःया निर्यात ८.२ प्रतिशतं अप्वःगु खँ नेपाल तयारी पोशाक उद्योग संघं धाःगु दु । थ्वयां न्ह्यव प्यदँ तक लगातार दँय् न्यागू अर्बया ल्याखय् हे जक निर्यात जुयाच्वंगु खः ।
संघया अध्यक्ष चण्डिप्रसाद अर्यालं धयादीगु दु, ‘थ्व दँया सुरुया महिनाय् निर्यात अप्वःगु खनेदत । थुकियात स्वयाः ढुक्क हे जुइगु अवस्था धाःसा मदुनि, तर आशा यायेथाय् धाःसा खनेदत । सरकारं ध्यान बीफत धाःया निर्यात अप्वयेके फइगु गाक्कं आधारत दु ।’
आर्थिक दँ २०७४÷७५ या न्हापांगु चौमासिकया तुलनाय् चालु आर्थिक दँया न्हापांगु प्यला दुने ८.२ प्रतिशतं अप्वया निगू अर्ब २१ करोडया तयारी वसः निर्यात जूगु दु ।नेपालय् सन २००२ निसें तयारी वसःया बजाः व निर्यात बांलाना वःगु खःसां थीथी कारणं उद्योग बन्द जुयाः समस्या जुयाच्वंगु खः ।
थौंकन्हय् नं निद्वगलं मल्याक सिलाइ मेसिन ज्याख्यलय् मवयाः थानाच्वंगु खँ धाःगु दु । थ्व उपकरणत संचालनय् हयेफत धाःसा अझ बांलाइगु खँ धाःगु दु । नेपाली सेना, नेपाल प्रहरी, सशस्त्र प्रहरीया पोशाकय् स्वदेशय् हे उत्पादन यायेगु यात धाःसा थुपिं मेसिनत हाकनं संचालनय् हयेफइगु खँ व्यवसायीतय्सं धाःगु दु ।
अथेहे माःगु कच्चा पदार्थ स्वदेशय् हे उत्पादन यायेगु निंतिं नं व्यवसायीतय्सं सरकारया ध्यानाकर्षण याःगु दु । नेपालय् सन् १९८० या दशक निसें तयारी वसः उद्योग संचालनय् वःगु खः । सन् १९९०या दशकय् थ्यंकबलय् द्वःछिगुलिं मल्याक उद्योग संचालनय् वःगु तथ्यांक दु । उबलय् निर्यात ३८९ लाख डलर तक थ्यंगु खः । सन् २००३ निसें तयारी वसःया उद्योग बुलुहुं स्यनावंगु खः ।
सन् २०१७–१८ य् नेपाः पाखें कूल निर्यात ८१.३३ अर्ब जूगु खः । थुकी तयारी वसः जक ५.९७ अर्बया निर्यात जूगु खँ अध्यक्ष अर्यालं धयादीगु दु ।मेमेगु देशय् स्वयाः नेपालय् तयारी वसः उत्पादनया लागत थिकेगुलिं प्रतिस्पर्धात्मक क्षमता कमजोर जूगु खँ व्यवासायीतय्सं धाःगु दु । नेपाल चेम्बर अफ कमर्सया कार्यवाहक अध्यक्ष कमलेशकुमार अग्रवालं सरकारी कुतः खनेदुसं अझं लगानी प्रवद्र्धन जुइमफुगु खँ धयादिल ।
नेपाः सरकारं आःया हे जक स्वदेशी उत्पादन अप्वयेकेगु लक्ष्य तयाः थीथी २६ गू वस्तुया निर्यातय् ३ प्रतिशत नगद अनुदान बीगु व्यवस्था याःगु दु । तर थप प्रतिस्पर्धात्मक दयेकेत १० निसें १५ प्रतिशत अनुदान आवश्यक दुगु खँ महासंघया पूलांम्ह अध्यक्ष चण्डिराज ढकालं धयादीगु दु ।
महासंघं निर्यातलिसे सम्बन्धित उद्योगयात नगद अनुदान बीमाःगु, बैंक व वित्तीय संस्थापाखें सहुलियतपूर्ण ब्याजदरय् त्यासा बीमाःगु, आयकर छुट, एकमुष्ट कर प्रणाली, निर्यातजन्य उद्योग प्रवद्र्धन व बजारिकरणया लागि कोष दयेकेमाःगु एकीकृत रुपं ल्याब स्थापना यायेमाःगु, कच्चा पदार्थ स्वदेशय् उत्पादन यायेगु नीति हयेमाःगु खँ धयाच्वंगु दु ।
नेपाल उद्योग परिसंघया अध्यक्ष हरिभक्त ढकालं विदेशी ब्राण्डयात निरुत्साहित यानाः स्वदेशी ब्राण्ड प्रवद्र्धन यायेमाःगु खँ धयादिल । उद्योग वाणिज्य महासंघया वरिष्ठ उपाध्यष शेखर गोल्छां नेपालय् तयारी वसः उद्योग बांलायेफुगु सम्भावना दुगु खँ धयादिल ।
व्यवसायीतय् गुनासोयात संकेत यासें अर्थमन्त्री डा. युवराज खतिवडां स्वदेशी उत्पादनयात प्रोत्साहन यायेत सरकारया नीति दुगुलिं उत्पादन लागतय् छुट बिइगु निसें साझेदारी यायेगु, बन्द जुयाच्वंगु सुका व कापः उद्योग संचालनय् हयेत सरकार प्रतिबद्ध दुगु खँ धयादीगु दु । थुकिया निंतिं निजी क्षेत्रं थःपिनिगु इच्छा प्वंकेत नं इनाप यानादीगु दु ।
अर्थमन्त्री डा. खतिवडां स्वदेशी कापःयात सुरक्षा निकाय, स्कूल, स्वास्थय संस्थाय् अनिवार्य यानाः स्वदेशी उत्पादन हे न्यायेमाःगु व्यवस्थायात थप प्रभावकारी यायेगु खँ नं धयादिल ।
LEAVE YOUR COMMENTS