पौभाः–थांका चित्रकला प्रशिक्षण क्वचाल

येँ –  नेपाल ललितकला प्रज्ञा–प्रतिष्ठानया ग्वसालय् जूगु न्यान्हुयंकंया पौभाः–थांका चित्रकला प्रशिक्षण ज्याझ्वः क्वचाःगु दु । तालिम ज्याझ्वःया समापन प्रतिष्ठानया कुलपति केके कर्माचार्यं यानादीगु खः । तालिम समापन ज्याझ्वलय् नवासें प्रतिष्ठानया कुलपति कर्माचार्यं परम्परागत चित्रकला थुइकेत कलाकारयात न्यान्हुया ई पर्याप्त मजूगु धासें चित्रकला अध्यापन याकीगु शैक्षिक संस्थातय्सं थज्याःगु विषयय् आपालं स्यनेकने याये फइ धयादिल ।

वय्कलं धयादिल, ‘थःपिंसं इलय्व्यलय् थज्याःगु ज्याझ्वःपाखें कलाकारतय्त प्रशिक्षण बिउसां नं नियमित रुपय् परम्परागत चित्रकलाया विषय अध्ययन याकीगु धइगु कलेजतय्सं खः ।’ज्याझ्वलय् प्रतिष्ठानया शिल्पकला विभागया प्रमुख बुद्धिबहादुर गुरुङं परम्परागत कला प्रशिक्षण प्रदेशस्तरय् नं ग्वसाः ग्वयेगु योजना दुगु जानकारी बियादिसें परम्परागत चित्रकलाया ऐतिहासिक व परम्परागत महत्व दुगु खँ न्ह्यथनादिल ।

कला समीक्षक तीर्थ निरौलां झीगु धर्म, संस्कृति व संस्कारया न्हाय्कं धइगु हे परम्परागत चित्रकला खः धासें वय्कलं थुकिं हे नेपाःयात अन्तर्राष्ट्रिय जगतय् नं म्हसीका तयेगु ज्या यानाच्वंगुलिं थुकियात ध्याकुनय् लाइगु ज्या याये मजिउ धयादिल । प्रतिष्ठानं वंगु विहीवाःनिसें न्ह्याकूगु प्रशिक्षणय् दक्वं प्रदेश व ललितकला विषयया प्राध्यापन जुइगु कलेजय् अध्ययन यानाच्वंपिं विद्यार्थीनापं यानाः मुक्कं स्वीच्याम्हेसिया सहभागिता दुगु खः ।

नेवाः परम्पराय् थीथी द्यःपिनिगु किपा व आकृति च्वयेगुयात हे पौभाः धाइगु खःसा बुद्ध दर्शनय् आधारित बुद्धकालीन विषययात कापः व नेपाली भ्वँतय् च्वयातःगु किपा हे पौभाः खः । ज्याझ्वलय् नवासें कलाकार पूर्णप्रसाद ह्योजु व प्रशिक्षार्थी यशकुमार केसीं कलाकारं धार्मिक, ऐतिहासिक, सांस्कृतिक महत्व कुबियाच्वंगु परम्परागत चित्रकलाया विकास व विस्तार याना यंकेमाःगु खँय् बः बियादिल ।

सम्बन्धित बुखँ

LEAVE YOUR COMMENTS