‘संविधान संशोधनया अवस्था मदु’

येँ (नेपालभाषा टाइम्स)- एमाले–कांग्रेसया मंकाः सरकारं संविधान संशोधन यायेगु धकाः एजेण्डा दयेकूसां नं संविधान संशोधनया छुं सम्भावना धाःसा आः तत्काल मदुगु खँ प्रतिनिधिसभाया सभामुख देवराज घिमिरें धयादीगु दु । म्हिगः बागमती प्रदेशया राजधानी हेटौंडाय् जूगु छगू ज्याझ्वलय् न्ववासें वय्कलं उगु खँ कनादीगु खः । संघीयतां यानाः देशया आर्थिक भार अप्वल धइगु गुनासो वःगु जुयाः संविधान संशोधनया खँ पिहां वःगु खःसां आः थथें संशोधनया अवस्था मदुगु खँ वय्कलं स्पष्ट यानादिल ।

वय्कलं धयादिल, ‘ई कथं संविधान संशोधन नं यायेमाः तर झीगु संविधान संशोधन यायेगु ई धाःसा अझ नं मत्यःनि । उकिं संविधान संशोधनया बारे जिं अप्वः खँ न्ववाये मखु ।’