बाहिरी चक्रपथ निर्माणया विवाद, चीनं न्हूगु डीपीआर दयेका बीगु
येँ – बाहिरी चक्रपथया डीपीआर चीनं दयेका बीगु जूगु दु । चीनं थ्व डीपीआर निःशुल्क दयेका बीत्यंगु खः । शहरी विकास मन्त्रालयं थ्वहे दँया दुने चीन सरकारया ग्वाहालिं डीपीआर दयेकाः थ्वहे दँया दुने ज्या न्ह्याकेगु कथं तयारी यानाच्वंगु दु । शहरी विकास मन्त्री मोहम्मद इस्तियाक राईया कथं पुलांगु डीपीआर व अध्ययन प्रतिवेदन चीन सरकारयात लःल्हात धाःसा प्यलाया दुने डीपीआर दयेका बीगु प्रतिवद्धता चीनं प्वंकूगु दु ।
वय्कःया कथं प्रारम्भिक सहमतिया निंतिं फाइल अर्थ मन्त्रालयय् छ्वयेधुंकूगु दु । अर्थ मन्त्रालयया सहमति लिपा कानुन मन्त्रालय छ्वयेगु व कानुन मन्त्रालयपाखें सहमति जुल धाःसा मन्त्रिपरिषदं पारित यानाः डीपीआर दयेकेगु ज्या न्ह्याकेगु खँ नं मन्त्री राईनं कनादिल । ७२ किलोमिटर ताःहाकःगु बाहिरी चक्रपथ पुलांगु डीपीआर कथं दयेकेबलय् थीथी कथंया समस्या वइगु जुयाः आः न्हूगु डीपीआर कथं ज्या यायेमाःगु खँ धाःगु दु ।
पुलांगु डीपीआर दुगु आपालं थासय् भूमाफियातय्सं चिचीकू यानाः जग्गा कित्ताकाट यानातःगुलिं न्हूगु डीपीआर दयेकेमाःगु खः । आः दयेकीगु डीपीआरय् लँ वनीगु प्वाइन्ट (एलाइन्मेन्ट) तकं हिलेमाःगु खँ धाःगु दु । अथे जुल धाःसा बाहिरी चक्रपथया लँ न्हापा गनं गनं वनी धयातःगु खः, आः अनं मवँसे मेथासं वनीगु नं सम्भावना दु । बाहिरी चक्रपथया आयोजनायात सरकारं पाइलट प्रोजेक्टया रुपय् कयातःगु दु ।
बाहिरी चक्रपथ दयेकेगु निंतिं चोभारं निसें सतुंगः तक ज्या न्ह्याकेत्यंगु खःसा उगु खण्डय् भूमाफियातय्सं ३ आना स्वयां म्हो जक दुगु ३ हजार कित्ता जग्गा कित्ताकाट यायेवं सरकारं न्हूगु डीपीआर दयेकाः जक ज्या न्ह्याकेगु तयारी याःगु खः ।यदि न्हूगु डीपीआर कथं लँया रुट हिला वन धाःसा भूमाफियातय्सं जग्गा न्यानाः यानातःगु लगानी सितिकं नं वनेफुगु खँ धाःगु दु ।
थ्व थासय् नेता व उच्चपदस्थ कर्मचारीतय्सं अप्वः जग्गा न्यानातःगु लूगु दु । वंगु वैशाखय् उगु खण्डया डीपीआर स्वीकृत जुइधुंकूगु खःसां भूमाफियातय्गु कारणं आः न्हूगु डीपीआर दयेकेमाःगु खँ मन्त्रालयं धाःगु दु । बाहिरी चक्रपथ दयेकेगु निंतिं ७६ खा छेँया लिसें ७८०० रोपनी जग्गा अधिग्रहण यायेमाःगु खँ धाःगु दु ।
बाहिरी चक्रपथया जवंखवं २५० मिटर जग्गा अधिग्रहण यानाः ५० मिटर तब्यागु लँ दुगु आधुनिक सहर दयेकेगु लिसें व्यवस्थित वस्ती विकास यायेगु सरकारया योजना दु । चोभार–सतुंगः खण्डया लागत ६ अर्ब ५० करोड तुइगु अनुमान दु । उकी मध्ये १ अर्ब ध्यबा धाःसा ७६ खा छेँयात क्षतिपूर्ति कथं बीगु खँ धाःगु दु ।
LEAVE YOUR COMMENTS