बुंगद्यःया खः दयेकेगु शुरु
यल- वर्षा व सहकालया द्यःकथं कयातःम्ह यलया बुंगद्यःया जात्राया निंतिं खः दयेकेगु तयारी शुरु जूगु दु । बुंगद्यःया खः दयेकेत आवश्यक दक्वं सिँ, बेत, पँ चूलाकेगु ज्या जुइधुंकूगु दुसा आवश्यक सामग्री निर्माण यायेगु ज्या नं जुयाच्वंगु दु । देय्या हे दकलय् ताःहाकःगु जात्राकथं कयातःगु बुंगद्यःया जात्राया निंतिं खः दयेकेगु निसें द्यः सालेगु तकया दुने आपालं समुदायया सहभागिता दइ । सिँ चायेगु, सिँया आवश्यक सामग्री दयेकेगुनिसें द्यःखः (रथ) दयेकेगु ज्याय् बिस्कं बिस्कं जातिया सहभागिताय् जुइगु गुथि संस्थान यलया प्रमुख शैलेन्द्र पौडेलं कनादिल ।
खः दयेकेत माःगु सिँ पाला हयेगु ज्या बोसी समुदायं याइगु खःसा इमिसं सिँ पालाः नं हयेधुंकूगु दु । अथे हे यंवाःतय्सं वइगु छुं दिंया दुने हे रथया निंतिं आवश्यक जुइगु घःचाः व घःमाः दयेकेगु नं शुरु जुइगु वय्कलं कनादिल । थगुने आवश्यक स्वयां अप्वः सिँ हःगुलिं थुगुसी म्हो जक मात्राय् सिँ हयागु संस्थानं न्ह्यथंगु दु । थगुने आवश्यक सिँ प्रयोग यानाः ल्यं दुगु सिँ मिलय् त्वःता तयागु धासें पौडेलं धयादिल, ‘वय्कःपिं थः हे नं इलय् ज्या यायेत सजग व सक्षम जुयादी, अय्नं जिमिसं नं वय्कःपिंत धया वयाच्वनागु दु ।’
बुंगद्यःया खः सालेगु जात्रायात देय्या हे दकलय् ताःहाकःगु जात्राकथं कायेगु यानातःगु दु । बुंगद्यःया जात्रा क्वचायेवं द्यःयात बुंगय् यंकी । थन खुलातक तये धुंकाः वयां लिपा यलया तःबहालय् च्वंगु देगलय् खुला तयेगु याइ । यलया पूच्वं द्यः सालाः शुरु जुइगु जात्रा जावलाख्यलय् प्वाकलं क्यनेवं क्वचाइ ।
LEAVE YOUR COMMENTS