आः एकिकृत नेवाः आन्दोलनया तयारी

येँ (नेपालभाषा टाइम्स) – स्वनिगःया थीथी थासय् थीथी स्वरुपय् नेवाःतय्सं यानाच्वंगु आन्दोलनयात एकीकृत रुपं न्ह्याकेगु बारे सहलह शुरु जूगु दु । गुथि आन्दोलन, खोना बुंगमति फास्ट ट्राय्क, उपत्यका सतक विस्तार पीडित संघर्ष समिति, ड्राइपोर्ट आयोजना विरुद्ध संघर्ष समिति, पशुपति गुरुयोजना विरुद्ध आन्दोलन, ख्वपया रंगशाला दयेकेगु निर्णय विरुद्ध आन्दोलन यानाच्वंगु समेत नीनिगू संस्थाया दुजःपिनि दथुइ आः मंकाः आन्दोलन न्ह्याकेगु बारे म्हिगः सहलह जूगु खः । फुक्क आन्दोलन एकिकृत जुल धाःसा सशक्त जुइगु खँ अन पिदंगु खः ।