येँ मनपां विद्यार्थी भर्ना अभियान न्ह्यायाकीगु

ये – येँ महानगरपालिकां विद्यार्थी भर्ना अभियान संचालन याइगु जूगु दु । थ्व हे वइगु बैशाख २ गतेनिसें १४ गतेतक ‘झीगु नगर, झीगु गां, सकलें मस्तय्त स्कुलय् थ्यंकेनु’ धइगु नारा बियाः थःगु लागा दुने विद्यार्थी भर्ना अभियान व घरदैलो अभियान संचालन यायेत्यंगु खः । विद्यालयं पिने लानाच्वंपिं मस्तय्त आखः ब्वंकेगु व विद्यालयतक थ्यंकेगु उद्देश्यं उगु अभियान संचालन यायेत्यनागु येँ मनपा शिक्षा विभागं न्ह्यथंगु दु ।

विभागं ग्वसाः ग्वःगु ‘सकारात्मक सोच विकास व गुणस्तरीय शिक्षासम्बन्धी अभिमुखीकरण’ ज्याझ्वलय् नवासें विभागया शिक्षा अधिकारी निर्मला केसीं वइगु बैशाख २ निसें १४ गतेतक विद्यार्थी भर्ना अभियान संचालन जुइगु जानकारी बियादीगु खः ।अभियान सिधयेवं बैशाख १५ निसें ३० गतेतक घरदैलो अभियान नं न्ह्याकीगु जूगु दु ।

भर्ना व घरदैलो अभियान नापनापं आः वइगु शिक्षा दिवस स्वयां न्ह्यः हे येँ महानगरयात साक्षर नगर घोषणा यायेगु ल्याखं ज्या न्ह्याः वनाच्वंगु वय्कलं धयादिल ।
ज्याझ्वलय् येँ मनपा प्रशासन महाशाखा प्रमुख गणेशप्रसाद थपलियां देय्या भार कःघायेमाःपिं विद्यार्थीयात असल नागरिक दयेकेगु व थुकिया जिम्मेवारी कयातःपिं धइपिं शिक्षकं सकारात्मक व सृजनात्मक जुइ फत धाःसा जक असल नागरिक निर्माण याये फइगु विचाः तयादिल ।

येँ मनपा शिक्षा विभागया छगू तथ्यांककथं येँ महानगर लागा दुने न्यादँनिसें झिदँ तक उमेर समूहया करिब ३ प्रतिशत मस्त विद्यालयया पहुँचं पिने लानाच्वंगु दु ।
येँ महानगर लागा दुने ९१ गू सामुदायिक विद्यालय व ६४५ गू निजी विद्यालय यानाः मुक्कं ७३६ गू विद्यालय दु । सामुदायिक विद्यालयय् पीन्याद्वः विद्यार्थी अध्ययन यानाच्वंगु दुसा निजी विद्यालयय् छगू लाख न्यय्च्याद्वः ९७१ म्ह विद्यार्थी अध्ययन यानाच्वंगु दु ।