वैदेशिक रोजगारीइ वंपिं बाँकेया जक १९४ म्ह सम्पर्कविहीन
येँ (रासस)÷ वैदेशिक रोजगारीइ वंपिं बाँकेया १९४ म्ह मिस्त छेँजःपिंलिसे हे सम्पर्क विहीन जुयाच्वंगु दु । बांलाःगु ज्या दइगु लोभय् लालपाखें जःलाखःला देय् भारत व खाडी देशय् वंपिं थुपिं मिस्त सम्पर्कविहिन जुयाच्वंगु खः ।
वंगु दछि दुने १९४ म्ह मिस्तय् छेँजःपिंसं मालाबीगु निंतिं नेपालगंजय् च्वंगु माइती नेपालया ज्याकुथिइ निवेदन बिउवःगु खँ संस्थाया संयोजक केशव कोइरालां धयादिल । उमि थःथितिपिनि कथं जोखिमपूर्ण यात्रा याना वंपिं उपिं भारत व खाडीइ थ्यंकाः तंगु खः ।
माइती नेपाल नेपालगञ्ज कार्यालयया सन् २०१८ या तथ्यांक कथं बाँकेया कोहलपुर नगरपालिकाया ६२ म्ह, नेपालगञ्ज उपमहानगरपालिकाया ४२ म्ह, राप्तीसोनारी गाउँपालिकाया ३१ म्ह, बैजनाथ गाउँपालिकाया ३३ म्ह, खजुरा गाउँपालिकाया २० म्ह, जानकी गाउँपालिकाया प्यम्ह व डुडुवा गाउँपालिकाया निम्ह तनाच्वंगु दु ।
अप्वः थें पर्यटन भिसाय् खाडी मुलुकय् वंपिं उपिं स्वला तक परिवारया सम्पर्कय् दइगु व थ्वयां लिपा सुलाः ज्या यायेमालीगु बाध्यतां यानाः सम्पर्कय् मवइगु खँ कोइरालां धयादिल । अथेहे गुलिसितं धाःसा मालिकं जोखिमपूर्ण ज्या याकेबियाः छेँजःपिंत स्वापू तकं तयेके मबीगु नं जुयाच्वंगु खँ वय्कलं धयादिल ।
इलाका प्रहरी कार्यालय जमुनाहया इञ्चार्ज प्रहरी नायक निरीक्षक शिवकुमार वलीं छ्वयेबलय् दलालयात विश्वास यानाः सुलाः सुलाः छ्वइगु, अले तने धुंकाः जक प्रहरी व संघसंस्थाया सम्पर्कय् वइगु जूगुलिं मालेत नं थाकुगु खँ कनादिल । सन् २०१८ य् असुरक्षित यात्राय् वनेत्यंपिं ९२० म्हेसित धाःसा नेपालगञ्ज नाकां हे लित छ्वयाहयागु खँ नं वय्कलं कनादिल ।
अधिकारकर्मी कमला पन्तं सीमापार यौन शोषण व श्रम शोषण लिसें अंग मीगु निंतिं नं मानव बेचविखन जुइगु जुयाच्वंगु खँ कनादिल ।
बर्दियां १०१ म्ह तन
बाँकेया नापं लाःगु बर्दिया जिल्लां नं सछि व छम्ह तनाच्वंगु दु । बढैयाताल गाउँपालिकापाखें ३२ म्ह, बाँसगढी नगरपालिकापाखें २५ म्ह, मधुवन नगरपालिकापाखें २२ म्ह, बारबर्दिया नगरपालिकापाखें खुम्ह, राजापुर नगरपालिकापाखें स्वम्ह, ठाकुरबाबा नगरपालिकापाखें गुम्ह व गेरुवा गाउँपालिकापाखें प्यम्ह मिस्त तनाच्वंगु दु ।
उमि थःथितिपिंसं नं प्रहरी व मानव बेचविखत विरुद्ध ज्या याइगु संघसंस्थाय् मालाबीगु निंतिं निवेदन तयातःगु खः ।
LEAVE YOUR COMMENTS