सिण्डिकेट चीकेत अझं झंझट

सरकारं हे कानून दयेके मफयाः सिण्डिकेट कायम

येँ – देय्या यातायात ख्यलय् कायम जुयाच्वंगु सिण्डिकेट प्रणाली तोडे यायेगु धकाः सरकारं न्ह्याकूगु पलाः आः स्वयम् सरकारया हे कारणं फ्यासुया वंगु दु ।
सरकारं सिण्डिकेट प्रणाली खारेज यानाः कम्पनी ऐन अन्तर्गत यातायात व्यवसायीतय्त दुकायेगु धकाः तयारी याःगु खःसां उकिया लागिं यातायात प्राधिकरण गठन यायेगु धकाः सरकारं हःगु ग्वसाः हे आः तक ताःमलाःनिगु खँ धाःगु दु ।

यातायात प्राधिकरण गठन यायेगु लागिं सरकारं आः तक विधेयक हे तयार याःगु मदुनि । विधेयक तुरुन्त तयार हे जुल धाःसां नं आः च्वनीगु संसदया अधिवेशनय् उकियात पेश यानाः पारित याये मानि । संसदया ताल्लाया अधिवेशन वैशाखं जक च्वनीगु सम्भावना दु । अन विधेयक पेश यानाः पारित जुल धाःसां नं हानं ऐन कार्यान्वयन याइगु नियम, विनियम आदि दयेकेत अझ ई काइगु खँ धाःगु दु ।

थ्व फुक्क ज्या यायेबलय् कानून जक तयार जुइत नं खुला स्वयां अप्वः ई काये फुगु खँ सूत्रं धाःगु दु । उखे यातायात व्यवसायीत धाःसा सरकारं सिण्डिकेट प्रथा तोडे याये धायेवं उकी हुने सहमत जुइत तयार जूगु दु । सरकारं कानूनया व्यवस्था यायेवं थःपिं कम्पनी ऐन अन्तर्गत दुहां वये धकाः व्यवसायीतय्सं धायेगु यानाच्वंगु दु ।
थौंकन्हय् नेपालय् ३०० गू यातायात कम्पनी दुने दर्ता जुयाः करिब ३ लाखगः गाडी चले जुयाच्वंगु दु ।

थ्व गाडीत सरकारया मातहत दुहां मवल धकाः सरकारं थः मातहत हयेत स्वःगु खःसां आः तक ऐन तकं तयार याये मफुगुलिं ज्या न्ह्याये मफयाच्वंगु खँ धाःगु दु । थ्व ऐन तयार जुल धाःसां नं उकियात व्यवसायीतय्सं गुकथं काइगु खः धाये मफुनि धाःगु दु ।

महानगरय् ई टिकेटिङ
येँ मनपां यातायात व्यवस्थापन सम्बन्धी छगू विधेयक पारित यासें आः येँय् चले जुइगु सार्वजनिक गाडीइ ई–टिकेटिङ लागू यायेगु खँ धाःगु दु । थ्व झ्वलय् साझा यातायातं ई–टिकेटिङया लागिं तयारी याःगु दु । तर साझा याकःचां जक ई–टिकेटिङ याइबलय् यात्रुतय्त समस्या जुइगु जुयाः आः च्यागू झिगू तःधंगु यातायात कम्पनीलिसे जानाः छगू हे टिकटं थीथी बस गये फइगु व्यवस्था बारे बिचाः जुयाच्वंगु खँ धाःगु दु ।

 

सम्बन्धित बुखँ

LEAVE YOUR COMMENTS