टीकापुरया प्रतिवेदन पित बीत सभामुखया रुलिङ
येँ – प्रतिनिधिसभां टीकापुर घटनाया छानवीन यायेत नीस्वंगु लाल आयोगया प्रतिवेदन सार्वजनिक यायेत सरकारयात रुलिङ याःगु दु ।
बुधवाः सभामुख कृष्णबहादुर महरां टीकापुर घटनाया छानविन यायेत सर्वोच्च अदालतया पुलांम्ह न्यायाधीश गिरिशचन्द्र लालया नेतृत्वय् नीस्वंगु आयोगया प्रतिवेदन याकनं सार्वजनिक यायेत रुलिङ यानादीगु खः ।
राजपां आयोगया प्रतिवेदन सार्वजनिक यायेत माग यासें प्रतिनिधिसभाया बैठक अवरुद्ध यायेवं सभामुख महरां उगु रुलिङ यानादीगु खः ।
राजपां प्रतिवेदन सार्वजनिक मयायेकं बैठक न्ह्याके बीमखु धकाः अडान कायेवं सभामुखं सरकारयात उगु रुलिङ यासें बैठक १० मिनेटया निंतिं स्थगित यानादीगु खः ।
सभामुखया उगु रुलिङयात थरुहट आन्दोलनकारीतय्सं सकारात्मक पलाः धासें लसकुस याःगु दु । थरुहट आन्दोलनया नेता लक्ष्मण थारु ‘नेपालभाषा टाइम्स’ लिसे खँ ल्हासें उगु प्रतिवेदन न्हापा हे सार्वजनिक जुइमाःगु खःसां आः सभामुखपाखें रुलिङ जूगु सकारात्मक खः धयादिल ।
वय्कलं धयादी, ‘प्रतिवेदन सार्वजनिक जुइत यक्व लिबाय् धुंकूगु दु, अदालत यक्व न्ह्याःवनेधुंकूगु दु, आः उगु प्रतिवेदन पिने हये हे माः ।’
वय्कलं प्रतिवेदन पित महयाच्वंगु खँय् सरकारप्रति अझ नं शंका दुगु खँ नं कनादिल । प्रतिवेदन न्हापा हे सार्वजनिक जूगु खःसा थःपिंसं गुगु दुःख सीमाःगु खः अज्याःगु अवस्था मवइगु खः धासें अथे खःसां प्रतिवेदन सार्वजनिक जुल धाःसा थःपिनिगु निंतिं सन्तोषया विषय जुइगु खँ नं वय्कलं कनादिल ।
मेखे न्यायाधीश गिरिशचन्द्र लालं नं उगु प्रतिवेदन सार्वजनिक यात धाःसा देय्यात हे फाइदा जुइगु खँ कनादीगु दु । वय्कलं थम्हं प्रतिवेदन सार्वजनिक या धकाः धायेगु अवस्था मदुुसां प्रतिवेदन सार्वजनिक यात धाःसा थुकिं तराई मधेश जक मखु देय्या मेगु भूभागय् दुगु समस्या नं ज्यंकेत ग्वाहालि जुइगु खँ धयादीगु दु । वय्कलं ७०९ पाना दुगु प्रतिवेदन सरकारयात २०७४ माघ २९ गते लःल्हानादीगु खः ।
LEAVE YOUR COMMENTS