अनुमान हे याये मफइगु धाकुफय्

बारा व पर्साय् सीपिनि ल्याः २७ थ्यन

येँ – म्हीग बारा व पर्सा जिल्लाय् वःगु धाकुफय्यात कयाः जल तथा मौसम विज्ञान विभागं पूर्वानुमान याये मफुगुलिं आलोचना जुयाच्वंगु दुसा मेखे मौसमविद्तय्सं धाःसा अज्याःगु धाकुफय्या अनुमान यायेत थाकुइगु खँ धाःगु दु । वरिष्ठ मौसमविद् मणिरत्न शाक्यं ‘नेपालभाषा टाइम्स’ लिसे खँ ल्हासें तच्वकं वइगु धाकुफय्या अनुमान याये फइगु तर चीधंगु थासय् उत्पन्न जुइगु धाकुफय्या बारे पूर्वानुमान यायेत धाःसा थाकुइगु खँ कनादीगु दु ।

म्हो थासय् जक आकाझाकां वइगु थज्याःगु धाकुफय् छगू निसें निगू किलोमिटर दुने ब्वलनीगु जुयाः थ्व समस्या नेपालय् जक मखु विश्वया विकसित देसय् हे अनुमान यायेत थाकुयाच्वंगु जानकारी नं वय्कलं बियादिल । वंगु छुं ई न्ह्यः जक जापानया योकोहामाय् नं थज्याःगु हे धाकुफय् वयाः आपालं छेँया पौ पुइका यंकूगु खः । थज्याःगु धाकुफय्या गति म्हो इलय् हेतच्वइगु जुयाः आपालं क्षति याइगु खः ।

भारतं म्हीग हे थुकिया बारे जानकारी बिउगु तर नेपालय् छाय् थुकिया पूर्वानुमान याये मफुत धइगु बारे वय्कलं भारतं अज्याःगु अनुमान याःगु खःसां नं थाय्या बारे धाःसा अनुमान याये मफुगु खँ कनादिल । प्रि–मनसुन शुरु जूगुलिं आः हानं धाकुफय् वये फइगु खँ कँसें वय्कलं तर म्हीग आइतवाः वःगु थेंज्याःगु धाःसा मजुइगु खँ कनादिल । आइतवाः अन करिब बाघौ जक तसकं फय् वःगु खः ।

उलिया दुने अन दिकातःगु गुलिखे ट्रक तकं फातापुइका बिउगु खः ।बारा व पर्साया आपालं छेँया संरचना पुलांगु व कच्चा जूगुलिं नं यक्व क्षति याःगु खँ धाःगु दु । वंगु आइतवाः वःगु धाकुफसं आः तक २७ म्ह मनू सीगु खँ सरकारं धाःगु दु । अथे हे खुसः स्वयां अप्वः घाःपाः जूगु दु । सीपिं मध्ये नीन्याम्हेसिया सनाखत जुइधुंकूगु खँ गृह मन्त्रालयं धाःगु दु ।

धाकुफसं पीडितया उद्धार यायेत सरकार लिसें थीथी थासं ग्वाहालि वयेगु शुरु जूगु दु ।म्हिगः प्रधानमन्त्री केपी ओली नं थःगु मेगु कार्यक्रम त्वःताः बारा व पर्सा झाःगु खः । वय्कलं विमानं उगु लागाया निरीक्षण यानादीगु खःसा लिपा स्थानीय जनतायात नापलानाः राहतया लागिं सरकारं पूर्ण कुतः याइगु आश्वासन बियादीगु खः ।