नारायणहिति संग्रहालय प्रमुखया राजीनामा

येँ – नारायणहिति दरवार संग्रहालय लिसें गणतन्त्र स्मारक व्यवस्थापन तथा सञ्चालक समितिया कार्यकारी निर्देशक भेषनारायण दाहालं राजीनामा बियादीगु दु । कार्यकारी निर्देशक दाहालं म्हिगः समितिया ज्याकुथिइ राजीनामा बिउगु खँ संस्कृति, पर्यटन तथा नागरिक उड्डयन मन्त्री प्रेमबहादुर आलें कनादिल ।

नारायणहिति संग्रहालयया जग्गा बालं बियागु बारे छानविन यायेत अःपुइमा धकाः थम्हं राजीनामा बियागु दावी दाहालं यानादीगु दु । वय्कलं स्वीदँ तक पुरातत्व विभागय् थम्हं ज्या यानागु व संग्रहालयय् ज्या यानागु झ्वलय् थम्हं गुब्सं गलत नियतं ज्या मयानागु जिकिर नं यानादीगु दु ।

मन्त्रालयया सहसचिव होमप्रकास लुइँटेलया संयोजकत्वय् वंगु बुधवाः स्वंगु समितिं पुलांगु दरवारकालीन ऐतिहासिक बंकर तकं होटल सञ्चालनया नितिं बतास समूहं सम्झौताय् न्ह्यमथँसें अतिक्रमण याःगु खनेदुगु खँ न्ह्यथनातःगु दु ।

समितिं थःगु छानविन प्रतिवेदन संस्कृति मन्त्री प्रेमबहादुर आलेयात लःल्हाःगु खः । छानविन समितिया प्रतिवेदनय् धया–तःगु दु, ‘क्याफ्टेरियां छ्यले दइगु क्षेत्रफल व स्थानया स्पष्ट सीमांकन मयासें संग्रहालयया कार्यकारी निर्देशक दाहालं थःगु हे तजबिजं अप्वः क्षेत्र बियाः थप निर्माण ज्याया नितिं बतास कम्पनीयात प्रोत्साहन याःगु खनेदु ।’ बतास समूहं सार्वजनिक खरिद ऐन अःखः मिलोमतों नारायणहिति रेष्टुरेन्ट सहित १४ रोपनी जग्गा दंगु भावं बालं काःगु खँ छानविनं सीदुगु खः ।