येँय् नेकां व रास्वपा न्ह्यःने
येँ (नेपालभाषा टाइम्स)÷क्वचाःगु निर्वाचनया लिच्वः धमाधम वयाच्वंगु दु । लिच्वः कथं राजधानी येँया १० गू क्षेत्र मध्ये नेपाली कांग्रेसं न्यागू त्याकीगु सम्भावना अप्वया वंगु दु । अथे हे न्हूगु शक्ति कथं पिलू वःगु राष्ट्रिय स्वतन्त्र पार्टीं प्यंगू व नेकपा (एमालें) छगू सिट त्याकीगु सम्भावना खने दयाच्वंगु दु ।
आः कांग्रेसं क्षेत्र नं. १ व ४ य् त्याकेधुंकूगु दुसा ३, ५ व १० य् अग्रता कयाच्वंगु दु । रास्वपा २, ६, ७ व ८ य् न्ह्यःने लायेधुंकूगु दु । राजधानी येँ गुगुं इलय् एमालेया गढ जुयाच्वंगु निर्वाचन क्षेत्र खः ।
येँया ४ नम्बर क्षेत्रय् नेपाली कांग्रेसया गगन थापा निर्वाचित जूगु दु । थापा २१ हजार ३०२ मत हयाः विजयी जुयादीगु खः । उकथं हे वय्कःया प्रतिद्वन्द्वी नेकपा एमालेया राजन भट्टराईं १३ हजार ८५५ मत हयाः लिउने लाःगु खःसा स्वंगू थासय् राप्रपाया ठाकुरमोहन श्रेष्ठ ४०५० हयाः स्वंगूगु थासय् लाःगु दु ।
उकथं हे येँया ९ नम्बर क्षेत्रय् नेकपा एमालेया कृष्णगोपाल श्रेष्ठ विजय जूगु दु । श्रेष्ठं ११ हजार ९५६ मत हयाः विजयी जुयादीगु खः । वय्कःया प्रतिद्वन्दी राष्ट्रिय स्वतन्त्र पार्टीया टेकबहादुर पोखरेल १० हजार १६१ मत हयाः लिउने लाःगु दुसा गठबन्धनया उम्मेदवार कल्पना धमला ६ हजार ४०२ मत हयाः लियां लिउ लाःगु दु ।
उकथं हे यलया २ नम्बर क्षेत्रय् नेकपा एमालेया प्रेमबहादुर महर्जन विजयी जुयादीगु दु । वय्कलं १५ हजार २५ मत हयाः विजयी जुयादीगु खःसा वय्कःया प्रतिद्वन्द्वी हाम्रो नेपाली पार्टीया डा. सुदिन शाक्यं ८ हजार ८८६ मत हयाः लिउने लाःगु खः ।
अथे हे प्रदेशपाखे येँया ८ नम्बर क्षेत्र प्रदेश (क) य् हाम्रो नेपाली पार्टीया शैलेन्द्रमान वज्राचार्य निर्वाचित जुयादीगु दु । वय्कलं ४ हजार ९१२ मत हयाः विजयी जुयादीगु खः । वय्कःया प्रतिद्वन्द्वी नेकपा एमालेया राजेश शाक्यं ३ हजार २२० हयाः लिउ लाःगु दुसा स्वंगूगु थासय् नेपाली कांग्रेसया राजुराज जोशी ३ हजार १३७ मत हयाः लियां लिउ लाःगु दु ।
अथे हे येँया २ (क) य राष्ट्रिय प्रजातन्त्र पार्टीया सुनिल कुमार केसी विजयी जुयादीगु दु । राप्रपाया केसीं ५ हजार ५९८ मत हःगु खःसा नेकपा एमालेया सानुकुमार श्रेष्ठ ५ हजार ७९ मत हयाः लिउ लाःगु दु । उकथं हे येँया क्षेत्र नम्बर ३ या प्रदेश सभाय् नेपाली कांग्रेसया छिरिङ दोर्जे लामा त्याःगु दु । उकथं हे यलया क्षेत्र नम्बर २ (क) या प्रदेशसभा दुजलय् नेकपा एमालेया रामेश्वर श्रेष्ठ त्याःगु दु । वय्कलं ८ हजार २९८ मत हयादीगु खःसा वय्कलं प्रतिद्वन्द्वी राप्रपाया धनराम केसीं ६ हजार ८५१ मत हःगु खः ।
LEAVE YOUR COMMENTS