दुर्गालालया ८७ दँ बुन्हिया लसता खँ

येँ – जनकवि दुर्गालाल श्रेष्ठया म्हिगः बुन्हि । म्हिगः वय्कः ८६ दँ पूवंकाः ८७ दँय् क्यन । थ्वहे लसताय् दुर्गालाल साहित्य प्रतिष्ठानं वि.सं. २०७८ दुने खस नेपाली भाषां वय्कःया जीवनी सफू ‘कविकथा’पिथनेगु क्वःछिउगु दु ।

नेपाल भाषां वय्कःया जीवनी सफू ‘कविया बाखं कविया भासं’ निदँ न्ह्यः पिदने धुंकूगु खःसां बन्दाबन्दीया कारणं नेपालय् विमोचन मजूनि । अमेरिका व बेलायतया नेवाः संस्थातय् ग्वाहालिं पिदंगु उगु सफू सम्बन्धित संस्थातय्सं थःथःगु देशय् उबलय् हे विमोचन यायेधुंकूगु दु । आः खस नेपाली भासं पिदनीगु जीवनीया लेखन अन्तिम चरणय् दुगु खँ धाःगु दु । साहित्यकार आर. मानन्धरं च्वयाच्वंगु उगु सफूया सम्पादन च्वमि राजेन्द्र महर्जनपाखें न्ह्यानाच्वंगु दु । ।