ताम्सिपाखा स्पोर्टस कार्निभल

येँ – येँ महानगरपालिका १८ वडाया ग्वसालय् जूगु न्हापांगु ताम्सिपाखा स्पोर्टस कार्निभल–२०७८ क्वचाःगु दु । कार्निभलय् बास्केटबल, फुटसल, म्याराथन, ब्याडमिन्टन व टेबुलटेनिस यानाः न्यागू कासा दुथ्याकातःगु खः ।

येँ महानगरपालिकाया प्रमुख विद्यासुन्दर शाक्यं कार्निभलय् दुथ्याःगु कासाय् विजयी जुयादीपिं कासामिपिंत पदक, दसिपौ व नगद पुरस्कार लःल्हानादीगु खः । कासाय् फुटसल व बास्केटबलय् न्हापयात झिंच्याद्वः, लिउयात झिद्वः तका, टेबुलटेनिस व ब्याडमिन्टनय् न्हापयात न्याद्वः व लिउयात स्वद्वः तका अथे हे म्याराथनय् न्हापयात च्याद्वः, लिउयात न्याद्वः व लियांलिउयात स्वद्वः तका सिरपाः लःल्हाःगु खः ।

ज्याझ्वलय् नवासें महानगर प्रमुख शाक्यं कााया माध्यमं स्वस्थ सहर निर्माणय् महानगरं लगानी यानाच्वंगु खँ कनादिल । कासा ख्यःपाखें मेमेगु ख्यलं नं आपालं सयेकेमाःगु खँय् बः बियादिसें कासाय् विजयी जुइत सीमित अवधीया निंतिं कडा प्रतिस्पर्धा जुइ । तर कासा सिधयेधुंकाः थवंथवय् न्हापा थें हे गुगु सद्भाव दइगु खः व मेमेगु ख्यलं नं सयेकेमाः धयादिल ।

वडाअध्यक्ष न्हुछेकाजी महर्जनं वडाया निंतिं कासा छगू अभिन्न ज्याझ्वः खः धासें थुकियात निरन्तरता बिया वनेगु जुइ धयादिल । वंगु फागुन ७ गतेनिसें न्ह्याःगु कार्निभलय् ताम्सिपाखा युथ क्लबं व्यवस्थापनय् ग्वाहालि याःगु खः ।