ने. सं. ११४४ कौलाथ्व तृतीया -

सम्झौता अवधि सिधइ आयोजना सिधइ मखु

आधुनिक प्रविधि (नेटवर्क आर्क ब्रिज) पाखें निर्माण जुइगु धयातःगु बिजुलीबजारस्थित धोबिखोला व तीनकुनेया बागमति ताँया सम्झौता अवधि सिधये धुंकाः नं ज्या सिधःगु मदुनि । थुपिं निगू ताँमध्ये बागमति ताँया सम्झौता अवधि वंगु भदौ व धोबिखोला ताँया निर्माण अवधि थगुने पुस महिनाय् हे सिधःगु खः ।

तर निगुलिं ताँया ज्या सिमधःगु जक मखु, ल्यं दुगु ज्यां तकं गति काये फयाच्वंगु मदु । डिजाइनया निंतिं हे आपालं ई काःगु व त्वनेगु लः, मत व धः लगायतया संरचना चिइकेगु ज्या मजूगुलि ज्याय् ढिलासुस्ती जुयाच्वंगु काठमाडौं उपत्यका सडक विस्तार आयोजनां न्ह्यथंगु दु । मेमेगु ताँय् न्हापां विज्ञतय्त डिजाइन यानाः जक ठेक्का आह्वान यायेगु याइगु खः ।

थ्व ताँय् धाःसा ठेकेदर स्वयम थःपिंसं डिजाइन याःगु इन्जिनियर विश्वविजयलाल श्रेष्ठं कनादिल । आयोजना बिउगु ढाँचाकथं ठेकेदार कम्पनीं डिजाइन यायेगु सम्झौताय् हे न्ह्यथनातःगु खः । डिजाइन यायेगु ज्यां हे सम्झौताया बछि ई अर्थात दत्याया ई काःगु वय्कलं धयादिल ।

वय्कलं धयादी, ‘ठेक्का अवधि शुरु जुइधुंकाःया न्हापांगु दत्या डिजाइनय् जक सिधल, ल्यं दुगु दत्याया इलय् नं इमिसं सरासर ज्या याये खंगु मदु ।वइगु दछिया दुने ज्या सिधयेकेगु योजना दुगु इन्जिनियर श्रेष्ठं कनादिल । नेपालय् न्हापांखुसी दुहां वःगु थ्व प्रविधि सहरी क्षेत्रया निंतिं उपयुक्त जूगुकथं कयातःगु दु ।

मेमेगु सामान्य प्रविधि (आरसीसी) स्वयां थ्व हाकः ताःहाकः जुइगुलिं आकर्षक जुइ । मेमेगु ताँय् भार बहन ताँया क्वय्या भागं याइगु खःसा थुकी ताँया च्वय्या भागय् लाइ । वय्कलं धयादिल, ‘थ्व ताँ च्वय् घानातःगु थेंज्याःगु खः ।’ निगुलिं ताँया ठेक्का सम्झौता २०७१ साल पुसय् जूगु खः । धोबिखोलाया ताँ स्वदँ व बागमतिया ताँ स्वदँत्याया दुने सिधयेकेमाःगु सम्झौताय् न्ह्यथनातःगु खः ।

ठेकेदारयात ज्या यायेत ‘साइट खुल्ला’ जुइमाःगु खःसां नं डिजाइन सिधःगु दछिया ई उकियात चिइकेत हे लगे जूगु वय्कलं धयादिल । आःतक नं उगु थासय् च्वंगु त्वनेगु लः, धः व मतया हाइटेन्शन लाइन चिइके फयाच्वंगु मदुनि । इन्जिनियर श्रेष्ठं धयादिल, ‘जिमिसं सम्बन्धित ज्याकूयात पत्राचार यानाः चिइकेत धयाच्वनागु दु ।’

ठेकेदार ज्या मयाःगु स्वयां नं अनच्वंगु पंगलं यानाः ज्या न्ह्याये मफयाच्वंगु इन्जिनियर श्रेष्ठं कनादिल । ठेकेदारं नं छुं बेवास्ता याःगु व ढिलासुस्ती याःगु खःसां नं ज्या सुस्त जूगुलिइ ठेकेदारयात ज्या यायेत थासय् खाली मफयाच्वंगु हे खः । ठेकेदार कम्पनीं ठेक्का काःगु छगू थासय् सरासर ज्या याये मखनेवं जनशक्ति व सामग्री मेथाय् हे यंकगु यानाच्वंगु दु ।

थुकिं यानाः ज्याय् थप ढिला जुइगु खः ।जापान सरकारया ग्वाहालिइ निर्माया जूगु माइतीघर–तीनकुने सतकखण्डच्यागू लेनया जूसां थनया थुपिं निगू ताँ धाःसा प्यंगू लेनया खः । धोबिखोला व बागमतिया ताँ निर्माण सिधयेवं मुक्कं सतक च्यागू लेनया जुइ । उगु तां तीनकुनेनिसें जडीबुटीतक न्हियान्हिथं जुइगु सतकय् सवारी चाप म्हो जुइगु आशा यानातःगु दु ।

विश्वया विकसित देय्या प्रविधि न्हापांखुसी नेपालय् दुत हःगु खः । ताँया च्वय्या तह अर्धवृत्ताकार संरचनाय् निर्माण जुइगु आयोजनां न्ह्यथंगु दु । दथुइ बल्लाःगु तार जडान यानातःगु दइ । उकिया दथुइ धलिं थें नं तयातःगु दइ । नेटवर्क तारं ताँया भार वहन क्षमता च्वय् व क्वय् यानाः सन्तुलनय् हइ ।

थुपिं निगुलिं ताँया ठेक्का फरक फरक कम्पनीं काःगु दु । तीनकुनेया ताँइा ठेक्का पप्पु कन्सट्रक्शनं काःगु खः । थ्व ताँया हाकः ८५ मिटर व ब्या १२ मिटरया दु । थ्व ताँया ठेक्का सम्झौताकथं वंगु भदौ महिनाय् सिधयेधुंकूगु दु । बिजलुबजारया ताँ थ्व हे पुस महिनाय् सम्झौता अवधि सिधःगु खः । थ्व ताँया ठेक्का जेई कन्सट्रक्शनं काःगु खः । थुकिया ब्या १२ मिटर व हाकः ५१ द्यशमलव ४५ मिटर दु ।