प्रहरीयात हातपात याःपिं प्यम्ह चिनियाँतय्त मुद्दा तइगु

येँ – नेपाःया प्रशासनिक क्षेत्र सिंहदरवार पिने प्रदर्शन यायेगु झ्वलय् प्रहरीतयात हातपात याःपिं प्यम्ह चिनियाँ नागरिकतय्त नेपाल प्रहरीं अभद्र व्यवहारया मुद्दा चले यइगु जूगु दु ।

थःपिंत चीन लितछ्वयेमाःगु माग यासें शुक्रवाः चिनियाँ नागरिकतय्सं सिहंदरवार न्ह्यःने प्रदर्शन याःगु खः । प्रदर्शनया झ्वलय् चिनियाँ प्रदर्शनकारीतय्सं प्रहरीयात हातपात तकं याःगु खः । अन प्रदर्शन याःपिं पीन्हय्म्हेसित प्रहरीं ज्वनायंकूगु खःसा उकी मध्ये पीस्वम्हेसित प्रहरीं शुक्रवाः हे त्वःतुगु दु । प्यम्हेसित धाःसा अभद्र व्यवहारया मुद्दा चले यायेगु तयारी याःगु दु ।

सरकारं तयातःगु निषेधित क्षेत्र न्ह्यःने प्रदर्शन याःगु धासें धर्नाय् च्वनाच्वंपिं चिनियाँ नागरिकतय्सं प्रहरीं चीकेत स्वःगु खः । उगु इलय् निगू पक्ष दथुइ झडप जूगु खः । झडपय् लानाः महानगरीय प्रहरी वृत्त सिंहदरवारया डिएसपी हरि बस्नते नापं चिनियाँ नागरिकत नं सामान्य घाःपा जूगु खः ।

थ्वहे दथुइ चिनियाँ दूतावासं छगू प्रेस व्यक्तव्य जारी यासें नेपाःया कानूनया पालना यायेत थः नागरिकतय्त इनाप याःगु दु । नापं दूतावासं चिनियाँ नागरिकतय्त अनावश्यक रुपं पिने पिहांमवेत व अन्तराष्ट्रिय उडान सूचारी मजूतले धैर्यतापूर्वक च्वनेत नं इनाप याःगु दु ।