आः एम्बुलेन्सया निंतिं नं छगू हे टेलिफोन

येँ – सरकारं आः एम्बुलेन्स सेवाया निंतिं नं छगू हे जक टेलिफोन नं. बीगु तयारी यागु दु । सरकारं एम्बुलेन्स सेवाया निंतिं देय्न्यंकं छगू हे नं.या टेलिफोन प्रयोग यायेगु प्रक्रिया न्ह्याकूगु खः । थ्व स्वयां न्ह्यः प्रहरीयात सम्पर्क यायेमाःसा १०० नं., दमकलया निंतिं १०१, ट्राफिक प्रहरीया निंतिं १०३, मस्त तन धाःसा १०४, सुयागुं फोन नं कायेमाःसा १९७ नं. प्रयोग जुया वयाच्वंगु खः । आः एम्बुलेन्सयात नं उकथं हे देय्न्यंकं छगू हे जक नं. प्रयोग यायेगु प्रक्रिया सरकारं न्ह्याकूगु खः ।

सरकारं देय्न्यंकंया एम्बुलेन्स सेवाया निंतिं छगू हे मंकाः नं. प्रयोगय् हयेगु योजना कथं एम्बुलेन्सया निंतिं ११२ नं. प्रयोगय् हयेगु तयारी यानाच्वंगु दु । थ्व नम्बरय् फोन यात धाःसा एम्बुलेन्स सेवाय् वनी कथं प्रक्रिया न्ह्याकूगु खः । एम्बुलेन्स संचालन सम्बन्धी निर्देशिका २०७३ या बुँदा नं. १२ य् नं स्वास्थ्य मन्त्रालयं एम्बुलेन्स सेवा संजालया निंतिं देय्न्यंकं छगू हे टेलिफोन नं. दइगु व्यवस्था यायेमाःगु खँ न्ह्यथनातःगु दु । निर्देशिकाय् न्ह्यथनातःगु उगु बुँदा लिबाक हे जूसां आः वयाः कार्यान्वनय् हयेगु तयारी मन्त्रालयं याःगु दु ।

एम्बुलेन्स निर्देशिकाय् एम्बुलेन्स संचालन व ट्र््याकिङ अन्तर्गत छगू हे क्षेत्रय् सेवा बीगु उद्देश्यं छगः स्वयां अप्वः एम्बुलेन्स संचालनय् दुगु अवस्थाय् दक्वं एम्बुलेन्सयात छगू हे संचालनय् आवद्ध जुइगु व्यवस्था मिले यायेमाःगु खँ न्ह्यथनातःगु दु । थ्व स्वयां न्ह्यः निजी ख्यलं संचालन जुयाच्वंगु एम्बुलेन्सया निंतिं स्वनिगः दुनेया हकय् १०२ नं.य् फोन यानाः थुकिया सेवा काये फइगु व्यवस्था यानातःगु खः । तर मानवीय सेवाया निंतिं अति आवश्यक एम्बुलेन्सया सम्बन्धय् सरकारी स्तरं धाःसा छुं नं नं.या व्यवस्था यानातःगु धाःसा मदु ।

स्वास्थ्य मन्त्रालयं न्हापांगु चरणय् मेडिकल टिम्स इन्टरनेशनल (एमटिआई), नेपालया ग्वाहालिइ धादिङय् परीक्षणया रुपय् ११२ नं.यात एम्बुलेन्सया मंकाः नं.या रुपय् छ्यालबुलाय् हयेगु योजना दयेकूगु खः । एम्बुलेन्स सेवा प्रयोगया निंतिं छगू हे मंकाः नं. छ्यलाबुलाय् हयेगु निंतिं प्रक्रिया न्ह्याये धुंकूगु व दूरसंचार प्राधिकरणलिसें सहलह जुयाच्वंगु मन्त्रालयया उपसचिव राजीव पोखरेलं कनादीगु दु । छगू हे जक मंकाः नं.या टेलिफोन जुइबलय् सेवाग्राहीयात लुमंकेत नं अःपुइगु व आपतकालीन इलय् स्वापू तयेत नं सहज जुइगु ल्याखं थुकथं छगू हे नं. संचालनय् हयेत्यंगु खः ।