येँ मनपाय् छेँथुवाःया समस्या अप्वः

येँ – येँ महानगरपालिकाय् दकलय् अप्वः छेँथुवाःतय् समस्या वयाच्वंगु खँ सी दुगु दु । येँ मनपा न्यायिक समितिइ अप्वःथें यानाः छेँथुवाःतय् समस्या वयेगु यानाच्वंगु दु । न्यायिक समितिया संयोजकलिसें येँ मनपाया उपप्रमुख हरिप्रभा खड्गी श्रेष्ठया कथं अज्याःगु उजुरी न्हिया दुने झिगू तक वयाच्वंगु दु ।

छेँया क्वथा बालं कयाच्वंपिंसं इलय् बाः मपुलीगु, लाक्वपाक्व ढंगं फोहर याइगु, धाःगु खँ टेरे मयाइगु, अन्त्यय् छुं हे जानकारी मबिसे क्वथा त्वःताः वनेगु यानाच्वंगु धइगु उजुरी वयाच्वंगु मनपां जानकारी बिउगु दु । विशेष यानाः कलंकी, कोटेश्वर, न्हू बानेश्वर, बागबजाः आदि लागाय् बालं तयातःपिं छेँथुवाःतय्सं उकथंया उजुरी यायेगु यानाच्वंगु समितिया संयोजक उपप्रमुख खड्गीं कनादिल ।

थ्व बाहेकं सार्वजनिक लँपु सम्बन्धी विवाद, जःलाखःलालिसेया विवाद, लःया समस्या, फोहर लाक्वपाक्व थासय् वांछ्वाइगु समस्या नं वयेगु यानाच्वंगु दु । अथे खःसां दकलय् अप्वः धाःसा छेँया बालंयात कयाः वयाच्वंगु समितिं न्ह्यथंगु दु । छेँया बाः म्हये मफुगु समस्यायात कयाः न्हिं च्यागू झिगू व वयाच्वंगु दुसा मेमेगु समस्यात कयाः अप्वलय् न्यागू तक उजुरी वयाच्वंगु दु ।

 

सम्बन्धित बुखँ

LEAVE YOUR COMMENTS