आः प्रदेश २ या सरकार हिलीगु?

येँ – संघीय संसदया सभामुख पदय् नेकपाया एकल उम्मेदवार अग्नि सापकोटा विजयी जुइवं नेकपा व राजपाया गठबन्धनं आः प्रदेश नं. २ या सरकार नं हिलेगु तयारी शुरु याःगु खँ सीदुगु दु । थ्व स्वयां न्ह्यः जूगु राष्ट्रियसभाया चुनावय् नेकपा–राजपा गठबन्धन छप्पँ जुयाः ल्वाःगु खःसा उकी पूर्व सहमति कथं नेकपायात निगू व राजपायात निगू सिटय् विजय प्राप्त जूगु खः ।

सापकोटा विरुद्ध सर्वोच्चय् लाना–च्वंगु रिटया पेशी नं म्हिगः हे दुगु खःसां उकियात सर्वोच्चं ‘हेर्न नमिल्ने’ धकाः म्हिगः लिछ्याना बिउगु खः । मेगु पेशी गबले जुइगु खः निश्चित मदुनि । आः सभामुख पदय् नेकपाया अग्नि सापकोटा निर्विरोध रुपं विजयी जुइवं उपसभामुख पद राजपायात बीगु सहमति जूगु दु । तर थ्व निगू दलया गठबन्धन उपसभामुखय् जक सीमित मजुसे प्रदेश २ या सरकार हिलेगुपाखे तक न्ह्याः वनीगु जूगु दु ।

प्रदेश २ लय् थौंकन्हय् राजपा व समाजवादी पार्टीया मंकाः सरकार चले जुयाच्वंगु दु । मुख्यमन्त्री समाजवादीं कयातःगु दु । यदि अन नेकपां समर्थन यात धाःसा मुख्यमन्त्री नं राजपायात वइगु निश्चित दु । राजपा व समाजवादी नापं मिले जुयाः चुनाव ल्वाःगु खःसां सरकार गठन लिपा धाःसा निगू पार्टी दथुइ मतभेद ब्वलंगु खः । आः नेकपाया साथ दयेवं राजपां समाजवादीयात वांछ्वयेगु तकया बिचाः यानाच्वंगु खँ सूत्रं धाःगु दु । थुकिया बारे खँ ल्हायेत राजपाया केन्द्रीय नेतात येँय् वयेगु तयारी जुयाच्वंगु खँ नं सीदुगु दु ।