यलया भिंद्यःया देगःया निंतिं छगू करोड ग्वाहालि

यल – थनया भिंद्यःया देगः पुनःनिर्माण यायेत एभरेष्ट बैंक लिमिटेडं छगू करोड तका ग्वाहालि याःगु दु । व्यापारीतय् आराध्य द्यःकथं माने याइम्ह यलया भिंद्यःया देगः पुनःनिर्माणया निंतिं बैंकया संचालक समितिया अध्यक्ष बिके श्रेष्ठं छगू करोड तका दां ग्वाहालि लःल्हानादीगु खः । २०७२ सालय् गोरखाया बारपाक केन्द्र विन्दु जुयाः भुखाय् ब्वःगु इलय् उगु देगः नं बांमलाक क्षतिग्रस्त जूगु खः ।

देगः न्हियान्हिथं जीर्ण जुया वनेवं स्थानीयवासीतय् सहभागिताय् उपभोक्ता छगू पुनःनिर्माण समिति हे गठन यानाः देगःया पुनःनिर्माण यायेगु ज्या जुयाच्वंगु दु । यलय कुल छेँ दुम्ह बैंकया अध्यक्ष श्रेष्ठं थः अबु साहु गणेशलाल श्रेष्ठया लुमन्तिइ देगः पुनःनिर्माणया निंतिं उगु ध्यबा ग्वाहालि यानादीगु खः ।

वय्कलं ग्वाहालिकथं लःल्हानादीगु दांया चेक यल महानगरपालिकाया प्रमुख चिरिबाबु महर्जन, ललितपुर उद्योग वाणिज्य संघया अध्यक्ष कृष्णलाल महर्जन, मंग त्वाः टोल सुधार समितिया अध्यक्ष किरणमान प्रधान व काठमाडौं उपत्यका संरक्षण कोष (केभीपीटी)या प्रमुख डा. रोहित रंजितकारयात लःल्हानादीगु खः ।

भिंद्यःया उगु देगः भुखाय् लिपा झन् जीर्ण जुया वनेवं पुरातत्व विभाग, यल मनपा, ललितपुर उद्योग वाणिज्य संघ, मंगः त्वाः टोल सुधार समितिया मंकाः कुतलय् छगू समिति हे दयेकाः पुनःनिर्माणया ज्या न्ह्याकूगु खः । लुँया जलप तयेगु बाहेकं देगः निर्माणया निंतिं जक प्यंगू करोड ग्वीस्वंगू लाख तका तुइगु अनुमान याःगु दुसा उकीमध्ये यल मनपां छगू करोड व प्रदेश नं ३ सरकारपाखें न्यय्गू लाख तका दां ग्वाहालि याइगु जूगु दु ।