सक्वया नादी खुसिइ माधवनारायणया देगः

येँ – सक्वया ऐतिहासिक नादी खुसि (शालिनदी)इ माधवनारायणया देगः दयेकीगु जूगु दु । नादी खुसिइ माधवनारायणया देगः दनेत डिजाइन तकं तयार यायेधुंकूगु दु ।

श्री माधवनारायण स्वस्थानी व्रत तथा शालिनदी सुधार समितिं स्वंगू करोड न्यय्गू लाख लागतय् उगु देगः दयेकेत्यंगु खः । समितिं बिउगु जानकारीकथं आर्किटेक्ट ई. अनिल श्रेष्ठं देगःया डिजाइनतकं तयार यानादीधुंकूगु दु ।

माघ लछियंकं स्वस्थानी बाखं कनीगु इलय् सक्वया नादी खुसिइ तःधंगु मेला जुइसा अन आपालं मनूत व्रत च्वनेत वयेगु याः । माधवनारायण व्रत च्वनीगु जगटीइ माधवनारायणया मू देगः दनेगु तयारी समितिं याःगु खः ।

नादि खुसिइ देगः दनेगु विषययात कयाः समितिया पदाधिकारी व सरोकारवालातय् दथुइ वंगु छुं दिं न्ह्यः जक छद्धगू सहलह मुँज्या जूगु खः । सहलहया इलय् देगःया डिजाइन तयार यानादीम्ह आर्किटेक्ट ई. श्रेष्ठं देगःया संरचनाया बारे जानकारी बियादिसें देगः दयेकेबलय् नादी खुसिया तटय् छु गज्याःगु हिउपाःत वइ धइगु बारे नं जानकारी बियादीगु खः ।

नेवाः कला, संस्कृति व ऐतिहासिकता पिज्वइकथं माधवनारायणया मूल देगः निर्माणया निंतिं जूगु सहलहया इलय् समितिया संस्थापकत, पुलांपिं अध्यक्षपिं, मूल पुरोहित, साँवागण, समितिया पदाधिकारी, सल्लाहकारलिसें सक्वया विशिष्ट गन्यमान्य व्यक्तित्वपिनिगु उपस्थिति दुगु खः ।

उगु देगः निर्माणया निंतिं सक्व नगरपालिका वडा नं. ६ या वडाअध्यक्ष राधाकृष्ण श्रेष्ठं निगू लख तका आर्थिक ग्वाहालि यायेगु प्रतिवद्धता प्वंकादीगु खः । देगः दनेगु निंतिं माधवनारायण व्रत च्वनीगु जगटी देगलय् छगू विशेष क्षमा पुजा नं याःगु दु ।