स्रिमिक युवा परिवारया हनेज्या

येँ – सिम्रिक युवा परिवारं छगू ज्याझ्वःया दथुइ वंगु नीच्यादँ न्ह्यवंनिसें समाजया थीथी ख्यलय् योगदान बियावयाच्वंपिं समाजसेवीपिंत हन ।

सिम्रिकं थुगु दँय् त्वाः, समाजलिसें भाषा, संस्कृति व शिक्षाया ख्यलय् तिबः बियाच्वनादीम्ह साहु लक्ष्मीदास मानन्धर, जीवंकाःछि बाजं स्यनेगुलि मदिक थःत पनादीपिं वाद्यगुरुपिं पुष्पकुमार (नाति) मानन्धर व बद्रिनारायण मानन्धर, ख्यालः स्यनामि नापं कलाकार गणेश साय्मि, कला–संस्कृति, सम्पदा संरक्षणया अभियानय् न्ह्यचिला च्वनादीम्ह अभियान्ता यादवलाल कायस्थ व नेवाःतय् देगुपुजाया बारे विद्यावारिधि (पीएचडी) यानादीम्ह डा. तिना मानन्धरपिंत हंगु खः ।

खुसिबुँस्थित नेपाः बैंक्वेटय् जूगु ज्याझ्वलय् मूपाहां शताब्दीपुरुष सत्यमोहन जोशीं वय्कःपिंत सम्मान पत्र व दोसला न्ययेकाः हनादीगु खः ।

स्रिमिक युवा परिवारया नायः अनुपकृष्ण मानन्धरया सभापतित्वय् न्ह्यागु उगु ज्याझ्वलय् पाहां कथं येँमपा १७ वडा अध्यक्ष नविन मानन्धर, लुम्बिनी विश्वविद्यालयया पुलांम्ह उपकुलपति प्रा. डा. त्रिरत्न मानन्धर, परिवारया संस्थापक कृष्णदास श्रेष्ठ, पुलांम्ह नायः श्याम मानन्धर, सल्लाहकारपिं कुमारदेव मानन्धर व पुष्प मानन्धरपिं झायादीगु खः। अथे हे उगु हे ज्याझ्वलय् थुगुसीया एसइइ परीक्षाय् उत्तीर्ण जुयादीपिं येँमपा १७ वडा दुनेया विद्यार्थीपिंत हनेगु ज्या याःगु खः ।