महानगरया विकास सहायता कार्यक्रमया प्रस्ताव छनोट
येँ(नेपालभाषा टाइम्स)÷येँ महानगरपालिकां विकास सहायता कार्यक्रमया प्रस्ताव छनोट याःगु दु । महानगरपालिकाया सामाजिक विकास विभागय् प्राप्त २०४ मध्ये ८९ गू प्रस्ताव छनोट याःगु खः ।
येँ महानगर उपप्रमुख सुनिता डंगोलया अध्यक्षताय् च्वंगु सामाजिक समितिया मुँज्यां बजेटया सीमा दुने लाःगु, अप्वः अंक प्राप्त याःगु, आवश्यक भ्वं व प्रमाण पूवंगु प्रस्ताव छनोट याःगु खःसा आंशिक भ्वं, प्रमाण मगाःगु १०३ गू प्रस्तावात प्रतीक्षा सुचीइ तःगु दु । ल्यं दुगु प्रस्तावत धाःसा चिइकूगु दु ।
बैठकं सचेतनामूलक ज्याझ्वःया निंतिं निगू लख न्यय्द्वः, रोजगारमूलक ज्याझ्वःया निंतिं न्यागू लख बीत सिफारिस यायेगु निर्णय याःगु दु । अनुदान प्राप्त याइपिंसं सम्झौता लिपा ६० प्रतिशत व ज्या क्वचाःगु प्रतिवेदन यायेधुंकाः ल्यं दुगु ४० प्रतिशत ध्यबा बी ।
थ्व स्वयां लछि न्ह्यः पुस २१ गते च्वंगु समितिया बैठकं प्राप्त प्रस्ताव मूल्यांकन यायेत सूचक निर्धारण व छनोट समिति गठन याःगु खः । २ वडाअध्यक्ष राजेन्द्रकुमार श्रेष्ठया संयोजकत्वय् कार्यपालिका दुजः महेश नेपाली व ललिता खड्गीलिसें वित्त विभागया प्रतिनिधि व सामाजिक विभाग विभागया प्रमुख सदस्य सचिव दुगु समिति गठन याःगु खः । समितिं संस्था दर्ता व नविकरण, लेखापरीक्षण प्रतिवेदन, कर चुक्ता प्रमाणपत्र, सूची दर्ता लगायतया प्रमाण व मेमेगु भ्वंयात न्युनतम शर्तया रुपय् तःगु खः । बेरुजु दुगु व पेश्की फछ्र्यौट मयाःगु संघसंस्थालाई प्रारम्भिक छनौटं हे न्ह्यःने मयंकेगुकथं सूचक तयार याःगु खः ।
आपालं प्रस्ताव छनोट जूसां मस्तसम्बन्धी धाःसा छगू नं प्रस्ताव मवःगु खँ सीदुगु दु । प्रस्ताव छनोट लिपा बैठकय् उपप्रमुख डंगोलं वइगु दँय् माग व आपूर्ति, मस्त सहभागि जुइगु, रोजगारी सिर्जना, प्रविधिया विकास व विस्ताय् ग्वाहालि जुइकथंया प्रस्ताव व ज्याझ्वःयात प्राथमिकता बीत इनाप यानादिल ।
वंगु मंसिर १ गते छगू सार्वजनिक सुचं जारी यासें महानगरपालिकां महानगर कार्य क्षेत्र दुगु गैरसरकारी संघसंस्थां याइगु क्षेत्रगत ज्यायात संस्थागत व व्यवस्थित यायेत धाःसा प्रस्ताव आह्वान याःगु खः ।
छनोट जूगु प्रस्तावय् दकलय् अप्वः १ गू करोड विनियोजन जूगु ‘कासालिसे सम्बन्धित थीथी संघसंस्थायात ज्याझ्वःया निंतिं ग्वाहालि अन्तर्गत २७ गू प्रस्ताव वःगु खःसा उकीमध्ये प्रारम्भिक चरणय् १२ गू स्वीकृत जूगु दुसा १५ गू प्रतीक्षा सुचीइ लानाच्वंगु दु । अथे हे १० गू लख बजेट विनियोजन यानातःगु ‘नमूना छात्रा सांसद ज्याझ्वः’या निंतिं वःगु छगू जक प्रस्ताव नं छनोट जूगु दु ।
LEAVE YOUR COMMENTS