कैलालीइ नेवाः नेतृया चमत्कार
येँ – क्वचाःगु स्थानीय चुनावय् नेवाःतय् आदिभूमि येँय् हे नेवाः उम्मेदवारत त्याकेत थाकुयाच्वंगु इलय् येँनं तापाक पश्चिमया कैलाली जिल्लाय् धाःसा येँनं हे वंम्ह छम्ह नेवाः नेतृं धमाधम थःगु पार्टीया उम्मेदवारत त्याकाः सकसितं चकित याना बिउगु दु ।
टिकापुर घटनां यानाः चर्चाय् वःम्ह थारु नेता रेशम चौधरीं नीस्वनादीगु नागरिक उन्मुक्ति पार्टीया नेतृ खः मय्जु रंजिता श्रेष्ठ । मय्जु श्रेष्ठ नेता चौधरीया हे जहान नं खः । थौंकन्हय् रेशम चौधरी जेलय् लानाच्वंगु जुयाः पार्टीया कमाण्ड श्रेष्ठया ब्वहलय् लानाच्वंगु खः ।
नकतिनि क्वचाःगु स्थानीय तहया चुनावय् नागरिक उन्मुक्ति पार्टीपाखें कैलाली जिल्लाया प्यंगू पालिकाय् प्रमुख व स्वंगू पालिकाय् उपप्रमुख त्याकेधुंकूगु दु । वडा अध्यक्ष व सदस्य समेत यानाः थ्व पार्टीपाखें उम्मेदवारी बिउपिं ९९ म्ह जनप्रतिनिधि त्यायेधुंकूगु दु ।
थ्व पार्टीं कैलालीया थारु समुदाय दथुइ थःगु पकड बल्लाकाः थुकथं विजय हासिल यानाच्वंगु खः । कैलालीया टीकापुर नगरपालिकाया मेयर पदय् थ्व पार्टीया रामलाल डगौरा लगायत निगू वडाय् अध्यक्ष त्याकूगु दु । अथे हे भजनी नगरपालिकाय् नं थ्वहे पार्टीया मेयर केवल चौधरी, उपमेयर राजु तिरुवा लिसें स्वम्ह वडा अध्यक्ष त्याःगु दु ।
उकथं हे जानकी गाउँपालिकाया अध्यक्ष व उपाध्यक्ष लिसें जोशीपुर गाउँपालिकाया नं अध्यक्ष व उपाध्यक्ष नं थ्वहे पार्टीया उम्मेदवार त्याःगु दु ।
टीकापुरय् प्रहरी चौकी आक्रमण यानाः प्रहरी अधिकारी स्याःगु घटनायात कयाः थारु नेता रेशम चौधरीयात ज्वनाः कुनातःगु दु । थ्व घटनायात कयाः मेपिं नं आपालं थारु नेतातय्त ज्वनाः कुनातःगु दु । रेशम चौधरी भूमिगत जुयाच्वंगु इलय् हे टीकापुर क्षेत्र नं. १ य् जसपापाखें प्रतिनिधिसभाया सांसद पदय् विजयी जुयादीगु खः । वय्कःयात लिपा सदनय् सपथ ग्रहण याकूसां जेल मुक्त धाःसा मयाः ।
वय्कलं थनिं खुला न्ह्यः तिनि जसपा त्याग यासें थःगु हे ‘नागरिक उन्मुक्ति पार्टी’ चायेकादीगु खः । उगु पार्टी चायेकेगु लागिं वय्कःया ज हान रंजित श्रेष्ठ सक्रिय जुयादीगु खःसा पार्टी अध्यक्ष नं श्रेष्ठ हे जुयादीगु खः ।
स्थानीय तहया चुनाव याइगु जुइवं कैलालीइ वनाः प्रचार प्रसार यायेगु व स्थानीय थारु समुदायया छेँय् छेँय् वनाः जनतायात थुइकेगु ज्याय् नं श्रेष्ठ सक्रिय जुयादीगु खः । थ्व ज्याय् वय्कःयात मेम्ह थारु नेता लक्ष्मण थारुं ग्वाहालि यानादीगु खः ।
श्रेष्ठ येँ देय्याम्ह हे स्थानीयवासी खः । वय्कःया नेतृत्वय् थ्व पार्टी आः कैलाली जिल्लाय् कांग्रेस व एमाले धुंकाः स्वंगूगु शक्ति जूगु दु । माओवादी केन्द्र प्यंगूगु थासय् लाःवंगु दु ।
LEAVE YOUR COMMENTS