मरिइ लुँया जलप
अबुया ख्वाः स्वयेगु दिं नकतिनि सिधल । सकसिनं थःअबुयात साःसाःगु, भिंगु, यःगु मरिचरि, सिसाबुसा नापं थीथीकथंया हलज्वलं तयाः ख्वाः स्वयादिल जुइ ।थौंकन्हय् बजारय् न्हापा न्हापा थेंज्याःगु मरिचरि न्यायेगु मदु । न्ह्याथाय् स्व, न्ह्यागु स्व । मिसावट, अखाद्य वस्तु, रंग ल्वाकछ्यानातःगु व बासि मरिचरियात बांलाक छायेपियाः मीत तयातःगु धइगु समाचार पिहां वयाच्वंगु दु ।
समाचारय् न्ह्यागु बिउसां न्यायेबलय् उकियात ध्यानय् तयाच्वनी मखु । उकिसनं झीसं मरि न्याः वनेबलय् छुं नं मरि किलोया स्वसः–प्यसः निसें अप्वलय् खुसः–न्हय्सः तका कायेगु यानाच्वंगु दु । तर छगू किलो मरिया हे झिंप्यद्वः तका नं वं धायेबलय् न्ह्याम्हेसिनं नं म्ये वां न्यायेफु । खः ।
भारतया गुजरात सहरया सुरतय् ‘गोल्डेन स्वीट’ नां बियातःगु मरिया भाः छगू किलोया हे ९,०००÷– भारु (अर्थात झिंप्यद्वः तका स्वयां अप्वः) तू । थज्याःगु मरियात ‘गोल्डेन स्वीट’ नां बियातःगु दुसा थपाय्सकं थिकेगु मरिइ लुँया जलप तयातःगुलिं खः ।रोहन मिठाइवाला नांया मरि पसलं थुभनं थिकेगु मरि वंगु छुं दिं न्ह्यः जक बजारय् हःगु खः ।
उगु मरि पसलं थ्व बाहेकं मेगु न्याताजि मरिया बजारय् हःगु खः, गुगु अतिकं उच्च गुणस्तरया खः । मरि पसःया थुवाःया कथं मरि छ्यःगु केसर स्पेनं हःगु खः । मरि पसलं १८० नं.या काजु, नरगिस कलम, पिस्ता बादशाह, केर गुन्ज व ड्राइफुट आउट नांया न्याताजिया उच्च गुणस्तरया मरि बजारय् हःगु खः । गुगु मरिया भाः दकलय् उच्च नं खः ।
LEAVE YOUR COMMENTS