मानसिक स्वास्थ्य लगानी अप्वयेकेत जोड

येँ (नेपालभाषा टाइम्स) – मानवीय सेवाया ज्याखँत यायेबलय् मानसिक स्वास्थ्य व मनोसामाजिक ग्वाहालिया क्षेत्रय् नं लगानी अप्वयेकेमाःगु खँय् विज्ञतय्सं बः बिउगु दु। कोभिड-१९या प्रतिकार्यय् अग्रपंक्तिइ च्वनाः ज्या यानाच्वंपिं ७० प्रतिशत चिकित्सक व स्वयंसेवकतय्के छुं न छुंकथंया मानसिक व मनोवैज्ञानिक समस्या नं खने दुगु अध्ययनं क्यंगु विज्ञतय्सं धाःगु दु ।

नेपाल रेडक्रस सोसाइटीपाखें वंगु अक्टोबर १० कुन्हु मानसिक स्वाथ्य दिवस हनेगु झ्वलय् जूगु ज्याझ्वलय् नवासें विज्ञतय्सं उगु खँ धाःगु खः । अन्तर्राष्ट्रियस्तय् जूगु सहलहय् म्यानमारय् कार्यरत डा. युवराज अधिकारीं कोरोना लिपा मानसिक स्वास्थ्य समस्या अप्वया वनाच्वंगु तर थ्व क्षेत्रय् लगानीइ बछिं मल्याक म्होति वःगुलिं नीति निर्मातत अतिकं गम्भिर जुइमाःगु अवस्था वःगु दु धयादिल ।

रेडक्रसया कार्यकारी निर्देशक उमेश ढकालं नेपालय् न्हिथं औसतय् झिंन्याम्हेसिनं आत्महत्या यानाच्वंगु व थगुने जक करिब ख्वीस्वलं आत्महत्या याःगु तथ्यांक न्ह्यब्वयादीगु खः । वय्कलं अन्तर्राष्ट्रिय रेडक्रसया अभियान व नेपाल रेडक्रसं मानसिक स्वास्थ्यया क्षेत्रय् याःगु ज्याया बारे नं प्रस्तुतीकरण बियादीगु खः ।

रेडक्रसया संचार निर्देशक दिव्यराज पौडेलं आईसीआरसी, नेपाल रेडक्रस, रेडक्रसया साझेदार सोसाइटी व रेडक्रस महासंघया प्रतिनिधि यानाः चय्न्याम्हेसिनं ब्वति कयादीगु जानकारी बियादीगु खः । ज्याझ्वलय् रेडक्रसया एशिया प्रशान्त क्षेत्रीय ज्याकूया विज्ञ एलिजा चेइबं एशिया क्षेत्रया राष्ट्रय् रेडक्रसं मानवीय सहायतया क्षेत्रय् मानसिक स्वास्थ्यय् गतिविध अप्वयेका यंकाच्वंगु तर थ्व पर्याप्त धाःसा मजूगु विचाः तयादीगु खः ।