पुनर्निर्माण प्राधिकरणं २३ करोड लित काल

येँ – राष्ट्रिय पुनःनिर्माण प्राधिकरणं लाभग्राहीपाखें थ्यंमथ्यं २३ करोड तका दां लित काःगु दु । थीथी कारणं छेँ दने मफुपिं लाभग्राहीपाखें थ्व ध्यबा लित कयागु खँ प्राधिकरण अन्तर्गतया अनुदान व्यवस्थापन तथा स्थानीय पूर्वाधार विभागं धाःगु दु ।न्हापा छेँ दयेके धकाः अनुदान सम्झौता यानाः आः छेँ मदयेकूपिं लाभग्राहीपाखें ध्यबा लित कयागु खँ कार्यालयया परियोजना प्रमुख गणेशराज वस्ती धयादिल ।

वय्कःया कथं सरकारं छक्वः बीधुंकूगु ध्यबा लित काइमखु धकाः न्हापा मेथाय छेँ दुपिंसं लिसें उगु हे छेँय् च्वने जिउपिंसं नं लाभग्राही धलखय् नां दुथ्याकाः ध्यबा काःगु खः । आः छेँ मदयेकूबलय् अथें ध्यबा काये जिइमखु धकाः बिचाः यानाः ध्याबा लित बी हयाच्वंगु खः । वय्कलं धयादीगु दु, ‘छेँ दयेके चाहे मजूपिं वा आवश्यक मदुपिं लाभग्राहीतय्सं थःम्हं हे ध्यबा लित बीगु सुरु यानाहःगु दु ।’

‘छेँ मदयेकूबलय् अथें ध्यबा काये जिइमखु धकाः बिचाः यानाः ध्याबा लित बी हयाच्वंगु दु’

गुलिखे लाभग्राही धाःसा द्वनाः लाभग्राही धलखय् लाःगु खँ कार्यालयं धाःगु दु । वय्कःया कथं सिइकं वा मसिइकं लाभग्राही जूपिं लाभग्राहीत मालेगु ज्या जुयाच्वंगु दु । सम्बन्धित व्यक्तिं थः च्वनाच्वनागु पालिकापाखें थ्व नम्बर खाताय् दुगु लगत कट्टा यानाबिउ धकाः निवेदन बीमाःगु खँ वय्कलं धयादीगु दु ।

परियोजना प्रमुख वस्तीया कथं पालिकापाखें जिल्ला आयोजना कार्र्यान्वयन एकाइ व अनं केन्द्रीय आयोजना कार्यान्वयन एकाइ थ्यनेवं लगतकट्टा जुइ । वय्कलं धयादिल, ‘नक्कली लाभग्राही म्हसीकाः ध्यबा लित हयेगु निंतिं स्थानीय तहया नं ग्वाहालि आवश्यक दु ।’
राष्ट्रिय पुनःनिर्माण पधिकरणया कथं आःतक देय्न्यंकं लाभग्राही धलखय् लाःपिं मुक्कं च्यागू लाख १२ हजार ३७१ म्ह दु ।

 

सम्बन्धित बुखँ

LEAVE YOUR COMMENTS