हेटौंडा व येँय् नेवाः–तामाङ प्रदर्शन

प्रदेश ३ या नां ‘नेवाः ताम्सालिङ’ तयेमाः धइगु माग यासें म्हिगः प्रदेश राजधानी हेटौंडाय् नं नेवाः आन्दोलनकारीतय्सं प्रदर्शन यात । हेटौंडाय् प्रदेश संसदया पिने म्हिगः येँनं वंपिं व हेटौंडाया हे स्थानीय नेवाः व तामाङ कार्यकर्तातय्सं पहिचानय् आधारित प्रदेशया नां तयेमाः धासें ब्यानर प्रदर्शन याःगु खः । संसद भवन पिने हेटौंडायात हे स्थायी राजधानी दयेकेमाः धइगु माग यासें छगू स्वतन्त्र प्रदर्शन नं जुयाच्वंगु खःसा नेवाः कार्यकर्तातय्सं उकिया नापं हे च्वनाः थःपिनिगु नं प्रदर्शन याःगु खः ।

समाजवादी नेवाः संघया नायः सत्यनारायण डंगोलया नेतृत्वय् वंगु उगु पुचलं प्रदेश सभाया सांसदपिं बसन्त मानन्धर, नरोत्तम वैद्य, विराज श्रेष्ठपिंत नापलानाः संसद दुने नेवाः ताम्सालिङ प्रदेशया लागिं सः तया बी माल धकाः इनाप याःगु खः । नापं प्रदेशया नामाकरण बारे नेवाःतय् अवधारणा नं सकलें सांसदतय् ल्हातय् तया बिउगु खः । अथे हे संसद भवनया पिने थीथी थासय् नेवाः ताम्सालिङ नां जुइमाः धकाः च्वयातःगु पोष्टर तिकेगु ज्या नं याःगु खः । नेवाः आन्दोलनकारीतय्सं सत्तारुढ दल नेकपाया नेता अष्टलक्ष्मी शाक्ययात नं नापलानाःथःगु धापू तःगु खःसा उगु इलय् नेता शाक्यं नां न्ह्यागु हे पारित जूसां उकियात संसदय् छलफल याकेमाःगु बिचाःतयादीगु खः ।

अथे हे ३ नम्बर प्रदेशया नां बागमति तःगुया विरोध यासें म्हिगः येँया माइतीघर मण्डलाय् नं प्रदर्शन जुल । नेवाः ताम्सालिङ संयुक्त संघर्ष समितिया ग्वसालय् जूगु उगु ज्याझ्वलय् थीथी जातीय संस्थां ब्वति काःगु खः । विरोध प्रदर्शयया झ्वलय् ‘बागमति प्रदेश चाहिँदैन, पहिचान मेट्न पाइँदैन’ धकाः प्लेकार्ड ब्वयेगु लिसें नारा थ्वयेकूगु खः । प्रदर्शन लिपा जूगु सभाय् कमानसिंह लामा, उमेश स्थापित, मोहन गोले, जय गोले व शोभा वज्राचार्यपिंसं सम्बोधन यानादीगु खः । वय्कःपिंसं दुई तिहाइ बहुमतं पारित यायेमाःगु नामाकरण सम्बन्धी निर्णय पारित याकेत पार्टीं सांसदतय्त ह्वीप तये दइ मखु धकाः संविधानय् हे च्वयातःगु कारणं छुं नं पार्टी उकिया अःखः वने मफइगु दावी यानादीगु खः ।