कारवाओ कप म्यानचेस्टर सिटीयात

म्यानचेस्टर सिटीं फाइनलय् चेल्सीयात बुकाः कारवाओ कप उपाधी त्याकूगु दु । चेल्सीया मैदानय् जूगु कासाय् सिटीं चेल्सीयात पेनाल्टी सुटआउटय् ४—३ गोलं बुकूगु खः । कासाया निर्धारित ९० मिनेट व थप इलय् निगुलिं टिम गोल यायेमफयेवं कासाया निर्णय पेनाल्टी सुटआउटं याःगु खः ।

सिटीया निंतिं रहिम स्ट्रलिंग, इल्के गुण्डोगान, सर्जियो अग्युरो व बर्नाडो सिल्भां गोल याःगु खः । चेल्सीया गोलकिपर केपा एरिजाबलागां लिरोय सानेया पेनाल्टी पनाबिउगु खः । चेल्सीया निंतिं धाःसा सिजर, इमरसन व इडेन हर्जाडं जक गोल यायेफत । डेबिड लुइसं थ्वाःगु पेनाल्टी गोल पोष्टय् लातसा जोहिनोया पेनाल्टी सिटीया गोलकिपर एर्डसनं पनाबिल ।

थ्व कासाय् चेल्सीया गोलरक्षक केपा एरिजाबलागा व चेल्सीया प्रशिक्षक माउसिजिओ सारी दथुइ विवाद नं जूगु खः । प्रशिक्षक सारीं केपायात परिर्वतन यायेत स्वःगु खःसा केपां प्रशिक्षकया खँ माने मजूगु खः । कासा पेनाल्टी वनीगु जूगुलिं केपाया थासय् मेम्ह गोलकिपर हयेत स्वःगु खः । तर केपा मैदानं पिहां वयेत माने मजूगुलिं सारीं थःगु निर्णय लित कायेमाःगु खः।