ससफो १३ वडाया न्हाापांगु अधिवेशन व न्हूधाः

येँ –  संघीय समाजवादी फोरम नेपाल येँ महानगरपालिका १३ वडाया न्हापांगु वडा अधिवेशन जुल । पार्टीया वडा कमिटीया अध्यक्ष जुजुकाजी महर्जनया सभापतित्वय् जूगु ज्याझ्वःया उलेज्या मूपाहां पार्टी सहअध्यक्ष लिसें सांसद राजेन्द्रप्रसाद श्रेष्ठं यानादीगु खः ।

ज्याझ्वलय् नवासें वय्कलं म्हिगः कांग्रेस व कम्युनिष्ट पार्टीयात मत बिउपिं गुलिखे पासापिंसं थःत नाप लाइगु इलय् ३ नं. प्रदेशया नां नेवाः–ताम्सालिङ वा नेपालमण्डल तयेमाः धकाः धायेगु यानाच्वंगु तर, पार्टी दुने धाःसा छुं नं भूमिका म्हितामच्वंगु धासें खाइसि पिनाः सन्त्रासि सइमखु धयादिल ।

पहिचान विरोधीतय्त तिबः बीगु धइगु सर्पयात दुरु त्वंकेगु थें खः धासें यल महानगरपालिकां मांभासं शिक्षा बीगु निंतिं स्कुल चायेकेत पहल याःगुलिं सुभाय् देछासे येँ महानगरपालिका धाःसा छाय् द्यनाच्वंगु खः धकाः न्ह्यसः तयादिल ।

ज्याझ्वलय् पार्टीया केन्द्रीय सल्लाहकार समितिया नायः डा. महेशमान श्रेष्ठं आदिवासी, जनजाति, मधेसी, मुस्मां, खस लगायत गुलि नं उत्पीडित जुयाच्वंपिं दु, इपिं सकसिगुं मुद्दा ससफों जक कुबियाच्वंगु दु धयादिल । नेवाःतय्त विस्थापित यायेकथं हःगु योजनाया सदननिसें सतकतय् तक विरोध यायेगु ज्या ससफों जक यानाच्वंगु वय्कलं धयादिल ।

पार्टी केन्द्रीय दुजःलिसें येँ महानगरया इन्चार्ज पवित्र वज्राचार्य, वैकल्पिक केन्द्रीय दुजः नापं येँ जिल्ला अध्यक्ष मनरत्न शाक्यं नं नवानादीगु ज्याझ्वलय् पार्टीया थीथी तहया नेतालिसें स्थानीयवासीतय्गु नं व्यापक उपस्थिति दुगु खः ।

अधिवेशनं श्रीकृष्ण महर्जनया अध्यक्षताय् वडा समितिया नं न्हूधाः याःगु खः । वडा कमिटीइ मञ्जुरी महर्जन उपाध्यक्ष, रविन्द्र मानन्धर सचिव, भाइराजा तुलाधर कोषाध्यक्ष व दुजलय् मंगलनारायण मानन्धर, सानुमैयाँ डंगोल, लक्ष्मी डंगोल, अशोक मालाकार व सुमन महर्जन च्वनादीगु दु ।

 

सम्बन्धित बुखँ

LEAVE YOUR COMMENTS