ने. सं. ११४३ तछलाथ्व द्वादशी -

मेगु वालय् न्हूम्ह सभामुख

प्रतिनिधिसभाया न्हूम्ह सभामुख ल्ययेगु निंतिं थ्वहे वइगु माघ १२ गते निर्वाचन जुइगु जूगु दु । म्हिगः च्वंगु प्रतिनिधिसभाया निगूगु बैठकय् सभामुखया भूमिकाय् दुम्ह जेष्ठ दुजः महन्थ ठाकुरं वइगु माघ १२ गते निर्वाचनया मिति क्वःछिउगु खः । सभामुखया निर्वाचनया मिति क्वःछीधुंकाः संसद सचिवालयं सभामुखया निर्वाचन तालिका सार्वजनिक याःगु खः । सभामुखया उम्मेदवारी दर्ता यायेगु ई धाःसा थनिंनिसें मंगलवाः सुथय् ७ बजे निसें २ बजे तक क्वःछिनातःगु दु ।

पुलांम्ह सभामुख कृष्णबहादुर महरायात सचिवालयया हे मिसा कर्मचारीयात बलात्कारया कुतः याःगु द्वपं लायेवं असोज १५ गते राजीनामा बियादीगु खः । उगु इलंनिसें सभामुखया पद प्वनाच्वंगु खः । नेपाल कम्युनिष्ट पार्टी (नेकपा) या सचिवालयया बैठकया निर्णय कथं नेकपां पुलांम्ह मन्त्री अग्नि सापकोटायात सभामुखया उम्मेदवार दयेकीगु जूगु दु ।

सभामुख व उपसभामुख छगू हे पार्टीया जुइ मजिउगु संवैधानिक व्यवस्था कथं म्हिगः हे उपसभामुख शिवमाया तुम्बाहाम्फें राजीनामा बियादीगु दु । उपसभामुख तुम्बाहाम्फे–यात पार्टीं राजीनामा बीत दबाब बिया वयाच्वंगु खःसां वय्कलं थः सभामुखया नितिं उपयुक्त जूगु दावी यासें थःत सभामुख दयेकेमाःगु माग याना वयाच्वंगु खः । म्हिगः थःगु राजीनामा बी न्ह्यः उपसभामुख तुम्बाहाम्फेया अध्यक्षताय् संविधानसभाया बैठक च्वंगु खःसा वय्कलं अनं हे
राजीनामाया घोषणा यानादीगु खः ।