जन चिकित्सालयया ३७ क्वःगु बुन्हि हनाज्याझ्वः

येँ – थनया न्ह्यःखाय् च्वंगु जन चिकित्सालयया ३७ क्वःगु बुन्हि हना छगू ज्याझ्वःया दथुइ क्वचाल ।चिकित्सालयया अध्यक्ष विमला मानन्धरया सभापतित्वय् न्ह्याःगु ज्याझ्वलय् मूपाहां प्रदेश नं. ३ या सांसद वसन्त मानन्धरं त्वाः देवाय् मत च्याका उलेज्या यानादीगु खः । ज्याझ्वलय् ‘स्वास्थ्य कोसेली’ स्मारिकाया नं चिखिफ्यने ज्या जूगु खःसा १० दँ तक स्मारिकाय् मदिक्क विज्ञापन बियाः ग्वाहालि यानादीपिं दातापिंत सम्मान नापं मतिनाया चिं नं लःल्हाःगु खः ।

ज्याझ्वलय् चिकित्सालयया संस्थापक सचिव दिनेशप्रसाद श्रेष्ठं झिद्वः तका आर्थिक ग्वाहालि यानादीगु खःसा जन चिकित्सालयं न्ह्याकाच्वंगु ‘पूर्ण–मिठ्ठा पलेस्वां अक्षकोष’या ग्वाहालिं मातातीर्थय् च्वंगु वृद्धाश्रमया ज्याथजिथिपिनिगु स्वास्थ्य परीक्षण याना यंकेगु बचं बियादीगु दु ।

अथे हे ल्हुतिइ च्वंपिं मदुपिं अमिरबहादुर राजभण्डारी व रिता राजभण्डारीया नामं वय्कःपिनि काय सुरेश राजभण्डारी व भौ प्रमिला राजभण्डारी मानन्धरं न्यय्द्वः तका दांया स्वास्थ्य सेवाया निंतिं अक्षयकोष नीस्वनादीगु खःसा येँमपा २५ वडाया वडा सदस्य डार्विन श्रेष्ठं दछिया छक्वः थःगु लछिया तलब चिकित्सालयात चन्दा कथं बीगु बचं बियादीगु खः ।

ज्याझ्वलय् नवासें मूपाहां प्रदेश नं. ३या सांसद मानन्धरं आपाःसिनं नेतातय्त ब्वः बीगु ज्या जक यानाच्वंगु, तर सरकारी कर्मचारीतय्सं चिचिधंगु ज्याय् तकं थीथी कथं त्वहः तयाः जनतायात दुःख बियाच्वंगु खँय् धाःसा सम्बन्धित निकायया ध्यान मवंगु खँय् दुःख प्वंकादिल । प्रदेशसभा सदस्य मानन्धरं चिकित्सालयया भौतिक पूर्वाधारया निंतिं ८० लाख तका बराबरया बजेट विनियोजन यानादीगु व येँ मनपापाखें भवन निर्माणया निंतिं टेन्डर आह्वान यायेगु ज्या नं जुइ धुंकूगु जानकारी बिउगु खः ।

ज्याझ्वःया सभापति मानन्धरं ज्याझ्वलय् ग्वाहालि यानादीपिं लिसें चिकित्सालययात अनेकथं ग्वाहालि यानादीपिं संघसंस्थाया प्रतिनिधिपिंत सुभाय् देछासे जन समुदायया हे ग्वाहालिं न्ह्यानाच्वंगु चिकित्सालय खयानं थःपिंसं सेवाग्राहीतय्त विशेषज्ञ चिकित्सकपिंपाखें गुणस्तरी सेवा बिया वयाच्वनागु खँ न्ह्यथनादिल ।

सम्बन्धित बुखँ

LEAVE YOUR COMMENTS