कन्हय् मांभाय् दिवसया थीथी ज्याझ्वः

येँ – कन्हय् फेब्रुअरी २१ तारिख । संयुक्त राष्ट्र संघं कन्हय्या न्हियात ‘अन्तर्राष्ट्रिय मातृभाषा दिवस’ या रुपय् हनेगु याना वयाच्वंगु दु । थ्व झ्वलय् नेपालय् नं थीथी थासय् मातृभाषा दिवस हनेगु ज्याझ्वः तयातःगु दु । कन्हय् मातृभाषा दिवस कुन्हु भाषा आयोगं सुथय् ९ बजे शंखमूलय् च्वंगु आयोगया ज्याकुथी मातृभाषा दिवस हनीगु जूगु दु ।

ज्याझ्वलय् न्हय्गुलिं प्रदेशय् ल्हाइगु छगू छगू भाय्या अभियन्तातय्सं थःगु भाषाया अवस्था बारे जानकारी बीगु ग्वसाः दु । थ्वहे लसताय् नेपाल प्रज्ञा प्रतिष्ठानं कन्हय् थीथी मांभासं कविता गोष्ठी याइगु ज्याझ्वः दु । थ्व स्वयां न्ह्यः थीथी जातिया सहभागिताय् छगू ¥याली पिकाइगु ग्वसाः दु ।

प्रतिष्ठानं थ्वहे लताय् थीथी मांभाय्या विषयय् छगू कार्यशाला गोष्ठी नं यायेत्यंगु दु ।अथे हे नेपाःस्थित बंगलादेश राजदूतावासं नं कन्हय् दूतावासय् हे मांभाय् दिवस हनीगु जूगु दु । संसारय् मांभाय् दिवस हनेगु चलन बंगलादेशंनिसें हे शुरु जूगु खः । थ्वहे झ्वलय् कन्हय् सुथय् येँया बालाजु भजन मण्डलय् नं मांभाय् दिवसया लसताय् विशेष ज्याझ्वः याइगु जूगु दु ।

हलिं नेवाः गुथि ल्हुति कचा, तिमिला खलः व भजन खलःया मंकाः ग्वसालय् उगु ज्याझ्वः जुइत्यंगु खः । अथे हे कन्हय् न्हिनय् थनया जनबहालय् नं मांभाय् दिवसया लसताय् न्वचु व कविता पाठया ज्याझ्वः यायेत्यंगु दु । कन्हय् हे सनिलया ४.३० बजे नेवाः यूट्युबया ग्वसालय् बागबजाःया सिटी म्याक्स हलय् नेवाः चीहाः संकिपा ‘बचं’ सार्वजनिक याइगु नं ज्याझ्वः दु । नेपालभाय् मांभाय् दिवस हनेगु चलन ‘लिजः’ नेपालभाषा कविता दबुलिं शुरु याःगु खः ।

युनेस्कोया आह्वान
संयुक्त राष्ट्र संघीय निकाय युनेस्कों विश्वन्यंकंया आदिवासी जनजातितय्त थःगु कथं मांभाय् दिवस हनेत आह्वान याःगु दु । सन् २०१९ यात संयुक्त राष्ट्र संघं नं मातृभाषा वर्षया रुपय् हनेगु याना वयाच्वंगु जुयाः थुगुसीया मांभाय् दिवस अझ विशेष जुइगु खँ धाःगु दु ।

युनेस्कोया प्रमुख ओड्रे अजौलें जारी यानादीगु वक्तव्यय् विश्वय् विकास, शान्ति व सहअस्तित्वया लागिं मांभाय् आवश्यक जुइ धासें संसारया ७००० गू भाय् स्थानीय आदिवासीतय्सं ल्हायेगु याना वयाच्वंगु खँ न्ह्यथनातःगु दु ।

सम्बन्धित बुखँ

LEAVE YOUR COMMENTS