येँ मनपाया महानगरया सहर झःझः धायेकेगु योजना

येँ- येँ महानगरपालिकां फिब्व ख्यः (माइतीघर मण्डला)यात छाय्पीगु ज्या याःगु दु । येँ मनपां उगु लागाय् ‘रात्रीकालीन सहरी सौन्दर्य ज्याझ्वः’ अन्त्तर्गत नमूना परीक्षणया रुपय् ‘एलइडी कलर पाइप लाइट’ जडान याःगु खः ।

न्हियान्हिथं थीथीकथंया आन्दोलन, धर्ना, प्रदर्शन, विरोधसभा व दीप प्रज्वलन थेंज्याःगु घटना मदिक्क जुयाच्वनीगु थुगु थासय् एलइडी कलर पाइप लाइट जडान लिपा फिब्व ख्यःया पहिचान हे फरक जुया बिउगु दु । कलर पाइप लाइन जडान लिपा फिब्व ख्यः सन्ध्याकालीन इलय् धाथें हे मनमोहक खने दया बिउगु दु ।

येँ मनपाया सहसचिव राजेश्वर ज्ञवालीयाकथं सहरया सौन्दर्यता अप्येकेत येँ मनपां बहनिसिया इलय् झिलिमिलि खने दइकथं ‘एलइडी कलर पाइप लाइट’ जडान यायेगु ज्या न्ह्याकूगु खः । ‘दकलय् अप्वः चहलपहल जुइगु व आपालं मनूत वयेवने याइगु माइतीघर मण्डलाय् थःपिंसं नमूना परीक्षणया रुपय् थुगु ज्याझ्वः न्ह्याकागु खः’ सहसचिव ज्ञवालीं धयादिल ।

वय्कलं विश्वया थीथी सहरय् सहरया बहनिसिया ई व जीवनयात जिवन्तता बीत थुकथंया ज्याझ्वःयात प्राथमिकता बिउगु खनेदु धासें येँ मनपां नं सहरया रात्रीकालीन सौन्दर्यता अप्वयेकेत व सन्ध्या काःईयात झःझः धायेकेत व अज्याःगु दृश्य स्वयाः नुगःयात सिचुकेगु व आनन्दित यायेत उगु ज्याझ्वः न्ह्याकागु जानकारी बियादिल ।

आःयात नमूना परीक्षणया रुपय् माइतीघर मण्डलाय् थुगु ज्याझ्वः न्ह्याकागु व येँ देय्यात विश्वस्तरया मेमेगु ततःधंगु सहर थें हे आकर्षक खने दयेकेत वइगु दिनय् थुकथं हे मनूत अप्वः वये वने याइगु, चहल पहल अप्वः जुइगु, धार्मिक, सांस्कृतिक, पर्यटकीयस्थल व सम्पदाया धलखय् दुथ्यानाच्वंगु मेमेगु थासय् नं थुकथं हे एलइडी कलर पाइप लाइट जडान याना यंकेगु योजना दुगु वय्कलं कनादिल ।

माइतीघर मण्डलया झिलिमिलि मतपाखें बांलाःगु प्रतिक्रिया वःगु धासें वय्कलं महानगरया छुं छुं थासय् महानगर थम्हं व छुं छुं थासय् निजी ख्यःया सामाजिक उत्तरदायित्व अन्तर्गत मत जडान याना वनेगु जुइ धयादिल । लिसें बुलुहुं आः न्हूसतक, थँबही, दरवारमार्ग लगायतया क्षेत्रय् नं उकथंया मत जडान यायेगु योजना दुगु नं वय्कलं कनादिल ।