ने. सं. ११४४ कौलाथ्व तृतीया -

मेलम्चीया ठेकेदार बिसिउँ वनेवं मन्त्री–सचिव कचवं

सीएमसी लित सःतेगुली विवाद

येँ – मेलम्ची आयोजनाय् इटालियन ठेकेदार बिसिउँ वनेधुंकाः आः गय् यानाः ज्या न्ह्याकेगु धइगु बारे खानेपानी मन्त्री बिना मगर व अनया कर्मचारी दथुइ विवाद ब्वलंगु दु । मन्त्री मगरं बिसिउँ वंम्ह इटालियन ठेकेदारयात लित सःतेगु कुतः यानाच्वंगु दुसा मन्त्रालयया सचिव व आयोजनाया प्रमुखत धाःसा उकी सहमत मदु ।

मन्त्रालयया सचिव गजेन्द्र ठाकुरं सीएमसीयात लित हयेगु कानुनी रुपं पाय्छि मजू तर्क तयाच्वंगु खः । विवाद जुइवं सचिव ठाकुरयात मन्त्रिपरिषदं सरुवा याना बिउगु दु । मन्त्री मगरं सीएमसीयात २ अर्ब ६० करोड तका पुलेत दबाब बिउगु धासें सम्झौता त्वाःथले धुंकूगु कम्पनीयात हयेगु स्वयां थनया हे कम्पनीयात ज्या बिल धाःसा फाइदा जुइगु अडान सचिवं तयाच्वंगु दु ।

मेलम्ची खानेपानी विकास बोर्ड नं सीएमसी लित सःतेगु पक्षय् मदुगु खँ सीदुगु दु । आयोजनाया कार्यकारी निर्देशक सूर्यराज कँडेलं मेलम्ची आयोजना क्वचायेकेत थःपिंसं ठोस योजना दयेकाः मन्त्रालययात लःल्हाये धुनागु खँ कँसें छवाःया दुने न्हूगु ठेक्का आह्वान याये फइगु अवस्थाय् थःपिं दुगु खँ कनादीगु दु ।

वय्कलं सीएमसी वयाः नं ज्या याइ धइगु ठेगाना मदु धासें वःसां नं २ अर्ब तका ग्राण्ड बीमाःगु व हेड वक्र्स मदयेकेगु थेंज्याःगु सर्त तःगुलिं उगु सर्त माने याये मफइगु खँ कनादीगु दु । सीएमसी लित हयेबलय् एशियाली विकास बैंक तंचाये फइगु खँ नं वय्कलं कनादीगु दु ।मन्त्री मगरं थः विशेष प्रतिनिधिपाखें सिंगापुरय् सीएमसी प्रतिनिधिलिसे वार्ता याकूगु खःसा उकी सीएमसीं तःगु शर्त मन्त्री मगरं स्वीकार याःगु खँ धाःगु दु ।

मेलम्चीलिसे आवद्ध कर्मचारीतय्सं इटालियन ठेकेदारयात ज्या याःगु वापत भुक्तानी बीगु लागिं तकं घूस फ्वंगु खँ पिहां वयाच्वंगु दु । थ्वहे घूसया खँ पिहां वइ धकाः कर्मचारीतय्सं सीएमसीयात हानं लित सःते चाहे मजुयाच्वंगु दावी नं सूत्रं धाःगु दु ।

‘फास्ट ट्राय्क’ य् यंकेत प्रस्ताव
विदेशी ठेकेदार कम्पनी बिसिउँ वनेधुंकाः आः मेलम्ची परियोजना नं ‘फास्ट ट्राय्क’ मोडेलं दयेकेगु तयारी शुरु जूगु खँ सीदुगु दु । थ्व मोडेलं ज्या यायेगु खःसा मन्त्रिपरिषदं हे निर्णय याये माःगु जूगुलिं आः थ्व प्रस्ताव मन्त्रिपरिषदय् छ्वःगु दु । तर मन्त्रिपरिषदं उकिया लागिं स्वीकृति बी वा बी मखु धइगु खँ धाःसा सी मदुनि ।

‘फास्ट ट्राय्क’ मोडलं ज्या यायेबलय् खरिद ऐन कथं टेण्डर आह्वान यानाः ठेकेदार ल्ययाच्वने माली मखु । थथे यानाः वन धाःसा आः वइगु स्वला–प्यलां हे मेलम्चीया बाँकी ज्या सिधयेके फइगु खँ धाःगु दु । खरिद ऐनय् वनाच्वन धाःसा ज्या सिधयेकेत स्वदँ बीगु खँ धाःगु दु । तर खरिद ऐनय् दुहां मवँसे ज्या यायेबलय् भ्रष्टाचार जुइगु सम्भावना यक्व दइगु जुयाः उकियात नियन्त्रण यायेगु उपाय बारे नं बिचाः यायेमाःगु खँ धया हःगु दु ।